ایوان صدر نے حکومت سے ایک سالہ کارکردگی کی رپورٹ مانگ لی

اسلام آباد( اباسین خبر)ایوان صدر نے حکومت سے ایک سال کی کارکردگی رپورٹ مانگ لی۔ذرائع کے مطابق، صدر آصف زرداری کے پارلیمنٹ کے مشترکہ اجلاس سے خطاب سے قبل ایوان صدر نے حکومت سے ایک سال کی کارکردگی رپورٹ طلب کی ہے۔ذرائع کا کہنا ہے کہ صدر اپنے خطاب میں حکومت کی ایک سالہ کارکردگی کے اہم نکات کا ذکر کریں گے، اور ان کی تقریر میں حکومت کے اہم معاشی اقدامات کے نتائج بھی شامل ہوں گے۔ایوان صدر کے ذرائع نے بتایا کہ صدر اپنے خطاب میں کشمیر اور فلسطین سمیت اہم علاقائی و عالمی امور پر بھی اظہار خیال کریں گے۔ اپوزیشن کے متوقع احتجاج کے پیش نظر صدر کے خطاب کا دورانیہ 20 سے 25 منٹ ہو گا۔ذرائع کے مطابق، پارلیمنٹ کا مشترکہ اجلاس 10 مارچ کو بلانے کا فیصلہ کیا گیا ہے، جس کے ساتھ ہی دوسرے پارلیمانی سال کا آغاز ہو جائے گا۔ سپیکر قومی اسمبلی پارلیمنٹ کے مشترکہ اجلاس کی صدارت کریں گے، اور عسکری قیادت، گورنرز، وزرائے اعلی سمیت صوبائی اسمبلیوں کے سپیکرز کو بھی مشترکہ اجلاس میں شرکت کی دعوت دی جائے گی۔