رمضان المبارک میں بارشوں کی پیش گوئی؛ موسم خوشگوار رہے گا

لاہور( اباسین خبر)رمضان المبارک کے دوران متعلقہ محکموں نے بارشوں کی پیش گوئی کردی ہے، جس کے نتیجے میں ماہ مقدس میں موسم خوشگوار رہے گا۔ پی ڈی ایم اے پنجاب کے ترجمان کے مطابق رمضان المبارک میں 2 سے 4 مارچ کے دوران صوبے کے بیشتر اضلاع میں بارشوں کی پیش گوئی کی گئی ہے۔ مری، گلیات اور دیگر پہاڑی علاقوں میں بارش اور برفباری کی بھی پیش گوئی کی گئی ہے۔ڈی جی پی ڈی ایم اے عرفان علی کاٹھیا نے کمشنرز و ڈپٹی کمشنرز کو الرٹ رہنے کی ہدایت کی ہے، جبکہ واسا، ریسکیو، محکمہ آبپاشی، لائیو سٹاک اور دیگر متعلقہ محکموں کو بھی الرٹ جاری کردیا گیا ہے۔ بارشوں کی پیش گوئی میں راولپنڈی، جہلم، اٹک، چکوال، سرگودھا، میانوالی، خوشاب اور منڈی بہاالدین شامل ہیں۔ لاہور، شیخوپورہ، حافظ آباد، گجرانوالہ، گجرات، سیالکوٹ، نارووال، فیصل آباد اور ٹوبہ ٹیک سنگھ میں بھی بارشوں کا امکان ہے، جب کہ ملتان، ڈیرہ غازی خان، راجن پور، بہاولپور، خانیوال، لیہ، بھکر، ساہیوال اور پاکپتن میں بھی بادل برسنے کی توقع ہے۔پی ڈی ایم اے کی جانب سے شہریوں سے گزارش کی گئی ہے کہ خراب موسم کی صورتحال میں غیر ضروری سفر سے گریز کریں اور ایمرجنسی صورتحال میں پی ڈی ایم اے ہیلپ لائن 1129 پر کال کریں۔محکمہ موسمیات کے مطابق لاہور سمیت پنجاب کے میدانی علاقوں میں دوبارہ خشک موسم کا سلسلہ شروع ہوگیا ہے، جس کے بعد مری اور گلیات میں گزشتہ 2، 3 روز بارش اور برفباری سے درجہ حرارت میں کمی آئی۔ پیش گوئی کے مطابق آج اور کل موسم خشک اور سرد رہے گا، لیکن 3 مارچ کو لاہور سمیت پنجاب کے بیشتر اضلاع میں دوبارہ بارشوں کے امکانات ہیں۔ لاہور میں کم سے کم درجہ حرارت 10 ڈگری سینٹی گریڈ تک گر گیا ہے، جبکہ زیادہ سے زیادہ 23 سینٹی گریڈ تک جانے کے امکانات ہیں۔