دورۂ نیوزی لینڈ سے ’بریک‘ لینے کیلئے پاکستان ٹیم کے سینئر کھلاڑیوں نے مشاورت شروع کردی

لاہور( سپورٹس ڈیسک)دورہ نیوزی لینڈ کے لیے پاکستان کرکٹ ٹیم کے سینئر کھلاڑیوں نے بریک لینے کے لیے مشاورت شروع کردی ہے۔پاکستان ٹیم کا اگلا اسائنمنٹ نیوزی لینڈ میں وائٹ بال سیریز ہے، جس میں 5 ٹی ٹوئنٹی اور 3 ون ڈے میچز کی سیریز 16 مارچ سے 5 اپریل تک شیڈول ہے۔ذرائع کے مطابق، بعض کھلاڑیوں کو چیمپئنز ٹرافی میں ناقص کارکردگی کی بنیاد پر ڈراپ ہونے کا خدشہ ہے، اور اس لیے کچھ کھلاڑی دورہ نیوزی لینڈ سے دستبردار ہونے کا سوچ رہے ہیں۔ذرائع کا کہنا ہے کہ کھلاڑی ڈراپ ہونے کے لیبل سے بچنے کے لیے دستبرداری کا فیصلہ کر سکتے ہیں۔ اس کے علاوہ، پاکستان کرکٹ بورڈ کے اعلی عہدیدار بھی چیمپئنز ٹرافی میں ناقص کارکردگی پر سخت ناخوش ہیں۔شاہین آفریدی، حارث رف، نسیم شاہ اور بابر اعظم کو ڈراپ کرنے کی خبریں بھی ہیں۔یاد رہے کہ آئی سی سی چیمپئنز ٹرافی 2025 میں دفاعی چیمپئن اور میزبان پاکستان کا سفر بغیر کسی جیت اور بغیر کسی سنچری کے اختتام پذیر ہوا تھا۔ چیمپئنز ٹرافی میں پاکستان کو گروپ اسٹیج میں نیوزی لینڈ اور بھارت سے شکست کا سامنا کرنا پڑا تھا، جس کے بعد ٹیم پہلے ہی سیمی فائنل کی دوڑ سے باہر ہو چکی تھی۔ آخری گروپ میچ بنگلادیش کے خلاف راولپنڈی میں ہونا تھا، مگر بارش کی وجہ سے وہ میچ بھی نہ ہو سکا۔