سابق وفاقی وزیر فواد چودھری 9 مئی کے پانچ مقدمات میں قصور وار قرار

لاہور( اباسین خبر)پولیس نے سابق وفاقی وزیر فواد چودھری کو 9 مئی کے پانچ مقدمات میں قصور وار قرار دے دیا۔انسداد دہشت گردی عدالت لاہور کے جج منظر علی گل نے فواد چودھری کی عبوری ضمانتوں پر سماعت کی۔ دوران سماعت پولیس نے فواد چودھری کی تفتیشی رپورٹ عدالت میں جمع کرائی، جس میں سابق وفاقی وزیر کو 9 مئی کے پانچ مقدمات میں قصور وار قرار دیا گیا۔اس موقع پر فواد چودھری نے اپنے سینئر وکیل کی غیر حاضری کے باعث سماعت ملتوی کرنے کی استدعا کی، جسے عدالت نے منظور کرتے ہوئے آئندہ سماعت پر وکلا کو دلائل کے لیے طلب کر لیا۔یاد رہے کہ فواد چودھری نے راحت بیکری کے باہر، شیر پا پل سمیت دیگر جلا گھیرا کے مقدمات میں عبوری ضمانت کروا رکھی ہے۔فواد چودھری کا میڈیا سے گفتگو میں بیان:انسداد دہشت گردی عدالت کے باہر میڈیا سے گفتگو کرتے ہوئے فواد چودھری نے کہا کہ رمضان المبارک میں حکومت نے آسانیوں کے بجائے پچاس وزیروں کا اضافہ کر دیا ہے، جبکہ امریکا کی حکومت چھوٹی ہو رہی ہے اور ہم اسے بڑھا رہے ہیں۔ انہوں نے کہا کہ حکومت چل نہیں رہی، وہ گھسیٹ رہی ہے، اور دھاندلی ان کے پاں کی بیڑیاں ہیں، جس سے ہر طبقہ حکومت کو بلیک میل کر رہا ہے۔انہوں نے مزید کہا کہ پی ٹی آئی قیادت حالات سے فائدہ نہیں اٹھا رہی اور گرینڈ الائنس بنانے میں ناکام ہے۔ سٹریٹ پاور مولانا فضل الرحمان اور پی ٹی آئی کے پاس ہے، لیکن مائنس فضل الرحمان کی کوشش کی جا رہی ہے۔فواد چودھری نے کہا کہ نااہل اپوزیشن اور حکومت کے درمیان عوام پھنسی ہوئی ہے، اور موجودہ پی ٹی آئی عہدیداروں کا کوئی سیاسی بیک گراونڈ نہیں۔ وہ 28 مقدمات کا سامنا کر رہے ہیں اور حالات پہلے جیسے ہی خراب ہیں۔ انہوں نے کہا کہ بانی پی ٹی آئی عمران خان سے مل کر تحریک چلانے کی اجازت لیں گے، اور اگر ملاقات نہ ہو سکی تو خود ایکشن لیں گے تاکہ انتقام کے کلچر کو ختم کیا جا سکے۔فواد چودھری نے یہ بھی کہا کہ بانی پی ٹی آئی کا باہر آنا تحریک کے ذریعے ممکن ہے اور مسلم لیگ اور پیپلز پارٹی کو انتقام کے کلچر کو ختم کرنے کی ضرورت ہے تاکہ سیاسی درجہ حرارت کم ہو سکے۔