ملک بھر میں بادلوں نے رنگ جما دیا، ابر رحمت اور برفباری سے نظارے حسین

لاہور( اباسین خبر)پنجاب، خیبرپختونخوا، سندھ اور بلوچستان میں بارشوں کا سلسلہ جاری ہے، جب کہ کشمیر، گلگت بلتستان اور کے پی کے بالائی علاقوں میں برفباری سے حسین مناظر دیکھنے کو ملے۔اسلام آباد، راولپنڈی، اٹک، رحیم یار خان اور دیگر علاقوں میں بارشیں ہوئیں، لاہور میں وقفے وقفے سے بارش کا سلسلہ جاری ہے۔ بلوچستان کے مختلف علاقوں میں بارش ہوئی، جبکہ کوئٹہ، سبی اور قلات میں بادل خوب برسے۔ مری میں گرج چمک کے ساتھ بارش اور ژالہ باری ہوئی۔بالائی علاقوں کی شاہراہیں بند ہو گئیں، گلگت میں شدید بارشوں اور لینڈ سلائیڈنگ کے سبب شاہراہ قراقرم کئی مقامات پر بند ہو گئی۔ داسو کے قریب بارش کی وجہ سے پہاڑ سرک گیا جس کے نتیجے میں کئی افراد پھنس گئے، لال پڑی کے مقام پر سیلابی ریلا سڑک بہا کر لے گیا۔گلیات کی بالائی چوٹیوں پر برفباری ہوئی، کوزہ گلی کے مقام پر متعدد گاڑیاں پھنس گئیں، جبکہ ایبٹ آباد میں شدید برف باری میں پھنسے سیاحوں کو ریسکیو کرلیا گیا۔محکمہ موسمیات کے مطابق پنجاب، خیبرپختونخوا اور بلوچستان میں آج بھی مزید بارشوں کا امکان ہے۔