چین میں 2 پاکستانی میڈیکل طلبا کے چرچے، ہیرو قرار دیا جانے لگا

بیجنگ( ایجوکیشن ڈیسک)چین میں میڈیکل کے 2 پاکستانی طلبہ کو ہیرو قرار دیا جارہا ہے۔یوسف خان اور رفیق اللہ نامی دو پاکستانی طلبہ سیاحت کے نیت سے ریلوے اسٹیشن پہنچے تھے جہاں انہوں نے ایک بزرگ شہری کو زمین پر گرا ہوا پایا۔ اس وقت پولیس اہلکار ارد گرد کھڑے تھے، اور چین میں کسی بھی شخص کو بغیر اجازت ہاتھ لگانا غیر قانونی ہے، چاہے وہ طبی امداد فراہم کرنے کے لئے ہو۔میڈیکل کے طلبہ ہونے کے ناطے، یوسف اور رفیق فورا سمجھ گئے کہ بزرگ شہری کو فوری طبی امداد کی ضرورت ہے۔ انہوں نے پولیس سے اجازت لی اور زمین پر نیم بے ہوش پڑے شخص کی نبض چیک کی، جو بہت کم رفتار سے چل رہی تھی اور دل کی دھڑکن بے ترتیب تھی۔ سانس بھی اکھڑ رہی تھی۔چونکہ وہ میڈیکل کالج کے فائنل ایئر کے طلبہ تھے، اس لئے انہیں دل کے دورے کی علامات نظر آئیں۔ انہوں نے فورا سی پی آر شروع کرنے کا فیصلہ کیا۔ یوسف نے اپنے دونوں ہاتھ متاثرہ شخص کی چھاتی پر رکھ کر سی پی آر کرنا شروع کیا جبکہ رفیق نے وقفے وقفے سے منہ کے ذریعے سانس دی۔چند ہی لمحوں میں متاثرہ شخص کی سانس بحال ہونے لگی اور یہ پورا واقعہ سی سی ٹی وی کیمروں میں محفوظ ہوگیا۔ سی سی ٹی وی فوٹیجز سوشل میڈیا پر وائرل ہوگئی اور صارفین نے پاکستانی طلبا کے جذبہ ہمدردی کو سراہا۔عالمی میڈیا کے مطابق، دونوں طلبا چین میں ہیرو بن گئے اور چینی میڈیا نے ان کا انٹرویو بھی کیا۔ پاکستان میں چین کے سفارت خانے نے ایکس پر اپنی پوسٹ میں پاکستانی طلبا یوسف خان اور رفیق اللہ کو سراہا۔