110 سے زائد جانیں چلی جائیں تو بات بھی نہ کی جائے؟ منعم ظفر

کراچی( اباسین خبر)امیرِ جماعتِ اسلامی کراچی منعم ظفر کا کہنا ہے کہ کراچی میں سب سے بڑے مسائل میں ڈمپرز اور ہیوی ٹریفک سے ہونے والے حادثات ہیں۔کراچی میں پریس کانفرنس کرتے ہوئے منعم ظفر نے کہا کہ شہر میں ٹریفک کے مسائل سنگین ہیں اور ٹریفک کی روانی بہتر بنانے کے لیے فوری اقدامات کیے جائیں۔ انہوں نے کہا کہ وزیرِ اعلی سندھ کا کہنا ہے کہ یہ صرف انتظامی معاملہ ہے اور اس پر سیاست نہیں ہونی چاہیے، لیکن انہوں نے واضح کیا کہ یہ انتظامی نہیں بلکہ لوگوں کی جان کا مسئلہ ہے۔منعم ظفر نے سوال کیا کہ جب ٹریفک حادثات میں 110 سے زائد افراد کی جانیں چلی جائیں تو اس پر بات کیوں نہیں کی جاتی؟ انہوں نے مزید کہا کہ میٹنگز ہو رہی ہیں لیکن کوئی عملی حل سامنے نہیں آ رہا، اور لوگوں کو ریلیف ملنا چاہیے۔انہوں نے بتایا کہ جماعتِ اسلامی نے اپنی سفارشات پیش کی ہیں اور آئی جی اور وزیرِ ٹرانسپورٹ کے سامنے بھی یہ سفارشات رکھی گئی ہیں۔