بلوچستان کے اسپتالوں کو مثالی بنائیں گے: سرفراز بگٹی

کو ئٹہ ( اباسین خبر)وزیرِ اعلی بلوچستان سرفراز بگٹی نے کہا ہے کہ بلوچستان کے اسپتالوں کو مثالی طبی ادارے بنائیں گے۔بلوچستان کے وزیرِ اعلی سرفراز بگٹی کی زیرِ صدارت اجلاس ہوا، جس میں محکمہ صحت بلوچستان اور پنجاب کے ماہرینِ طب نے محکمہ جاتی اصلاحات پر بریفنگ دی۔اجلاس میں بلوچستان میں صحت کے نظام کی بہتری کے لیے تمام اسٹیک ہولڈرز کے ساتھ جامع حکمتِ عملی اپنانے کا فیصلہ کیا گیا۔سرفراز بگٹی نے بلوچستان میں صحت کے بنیادی ڈھانچے کی بہتری کے لیے اقدامات تیز کرنے کی ہدایت کی۔ اجلاس میں گفتگو کرتے ہوئے انہوں نے کہا کہ صحت کے شعبے کو جدید خطوط پر استوار کرنے کے لیے وہ پرعزم ہیں، اور اسپتالوں میں جدید سہولتوں کی فراہمی یقینی بنائیں گے۔وزیرِ اعلی بلوچستان نے یہ بھی ہدایت کی کہ ڈیجیٹلائزیشن سے طبی سہولتیں، ادویات کی فراہمی اور مربوط نظام قائم کیا جائے۔انہوں نے کہا کہ بی ایم سی، سنڈیمن اور شیخ زید النہیان اسپتالوں کو مثالی طبی ادارے بنائیں گے۔