مریم نواز کی مقبولیت سے 2 صوبائی حکومتیں پریشان ہیں: عظمیٰ بخاری

لاہور( اباسین خبر)وزیرِ اطلاعات پنجاب عظمی بخاری نے کہا ہے کہ مریم نواز ایک سال بعد عوام کے سامنے اپنی کارکردگی پیش کرنے والی پہلی وزیرِاعلی ہیں۔لاہور سے جاری کیے گئے بیان میں عظمی بخاری نے کہا کہ مریم نواز پنجاب سمیت ملک بھر کے نوجوانوں کی پسندیدہ لیڈر بن چکی ہیں، اور نارووال کے کامیاب جلسے میں نوجوانوں کی بڑی تعداد اس کا کھلا ثبوت ہے۔انہوں نے مزید کہا کہ مریم نواز کی تیزی سے بڑھتی مقبولیت سے دو صوبوں کی حکومتیں پریشان ہیں۔عظمی بخاری نے کہا کہ پنجاب کے عوام نے مریم نواز کی کارکردگی پر اطمینان کی مہر لگائی ہے، اور ایک جماعت اور اس کے لوگ مسلسل ان پر غیر اخلاقی زبان استعمال کر رہے ہیں۔ انہوں نے کہا کہ پہلے بانی پی ٹی آئی مریم نواز کے بارے میں اخلاقیات سے گری ہوئی گفتگو کرتے تھے، اور اب یہ کام علی امین گنڈاپور اور بیرسٹر سیف نے بھی شروع کر دیا ہے۔عظمی بخاری نے کہا کہ مریم نواز کی خاندانی اقدار اور ان کی فیملی کی خواتین پر ترس آتا ہے، اور ان کا کہنا تھا کہ اڈیالہ کا قیدی اور اس کے چیلے بغض مریم میں ہلکان ہو رہے ہیں۔ انہوں نے مخالفین سے اپیل کی کہ وہ حسد اور تعصب کی عینک اتار کر پنجاب کے اچھے منصوبوں کی تعریف کریں۔