مریم نواز تعلیمی اداروں میں نفرت پھیلانے کی مہم چلا رہی ہیں، بیرسٹر سیف

پشاور( اباسین خبر)خیبر پختونخوا حکومت کے ترجمان اور مشیر اطلاعات بیرسٹر سیف نے وزیراعلی پنجاب مریم نواز پر تعلیمی اداروں میں نفرت پھیلانے کا الزام عائد کیا ہے۔ بیرسٹر سیف کا کہنا تھا کہ مریم نواز مختلف تقریبات کے دوران عمران خان اور علی امین گنڈا پور کے خلاف نفرت انگیز مہم چلا رہی ہیں۔انہوں نے مزید کہا کہ مریم نواز کی تقریریں ہمیشہ علی امین گنڈا پور پر تنقید کے بغیر مکمل نہیں ہوتیں، لیکن حقیقت یہ ہے کہ عوام اور بچے اچھی طرح جان چکے ہیں کہ ملک کو لوٹنے والے کون ہیں۔ ان کا یہ بھی کہنا تھا کہ جھوٹے پروپیگنڈے اور الزامات سے عوام کے دلوں سے پی ٹی آئی اور عمران خان کو نہیں نکالا جا سکتا۔بیرسٹر سیف نے کہا کہ خیبر پختونخوا حکومت عوامی خدمت پر یقین رکھتی ہے اور صوبے میں اسپتالوں میں مفت طبی سہولتیں، لائف انشورنس اور سولر انرجی جیسے منصوبے جاری ہیں۔ انہوں نے بتایا کہ خیبر پختونخوا واحد صوبہ ہے جو قرض لینے کے بجائے قرض واپس کر رہا ہے اور اس سال سرپلس بجٹ پیش کر رہا ہے، جبکہ پنجاب خسارے کا شکار ہے۔آخر میں، بیرسٹر سیف نے مریم نواز کو مشورہ دیا کہ وہ عمران خان اور پی ٹی آئی کو نشانہ بنانے کے بجائے اپنی توجہ عوامی فلاح و بہبود اور ترقیاتی منصوبوں پر مرکوز کریں، جیسے علی امین گنڈا پور کر رہے ہیں۔