معروف اداکار قاضی واجد کی آج 7 ویں برسی منائی جا رہی ہے

کراچی ( شوبز ڈیسک)پاکستان کے معروف اداکار قاضی واجد کی آج 7ویں برسی منائی جا رہی ہے۔ قاضی واجد 1930 میں لاہور میں پیدا ہوئے اور انہوں نے اپنے فنی کیریئر کا آغاز 10 برس کی عمر میں کیا تھا۔ انہوں نے ریڈیو پاکستان پر بچوں کے پروگرام “نونہال” میں صداکاری کا آغاز کیا اور ریڈیو پاکستان سے 25 برس تک جڑے رہے، جہاں ان کی آواز نے ہر سننے والے کو محظوظ کیا۔قاضی واجد نے پاکستان ٹیلی ویژن کے لیے 1967 میں پہلا ڈرامہ “ایک ہی راستہ” کیا، اور اس کے بعد ان کا مشہور ڈرامہ “خدا کی بستی” تھا جس سے انہیں ملک گیر شہرت حاصل ہوئی۔ ان کے دیگر مشہور ڈرامے “دھوپ کنارے”، “ان کہی”، “تنہائیاں”، “حوا کی بیٹی”، “چاند گرہن”، “پل دو پل” اور “انارکلی” بھی شامل ہیں۔قاضی واجد کو ان کی خدمات کے اعتراف میں 14 اگست 1988 کو صدارتی تمغہ برائے حسن کارکردگی سے نوازا گیا تھا۔ 11 فروری 2018 کو دل کا دورہ پڑنے کی وجہ سے کراچی میں ان کا انتقال ہو گیا۔ ان کے ادا کیے گئے کردار آج بھی ناظرین کے دل و دماغ میں زندہ ہیں اور ان کا فن ہمیشہ یاد رکھا جائے گا۔