جرمن اور ہالینڈ کے معروف کلبز کی ٹیمیں کل لاہور پہنچیں گی

لاہور( سپورٹس ڈیسک)لاہور ایک مرتبہ پھر کرکٹ کے ساتھ ساتھ ہاکی کے بین الاقوامی کھلاڑیوں کا بھی مرکز بن گیا ہے۔ جرمنی اور ہالینڈ کے معروف کلبز کی ٹیمیں کل لاہور پہنچیں گی، اور وزیراعظم کی ہدایت پر یوتھ پروگرام کی ٹیم بھی ان غیر ملکی کلبز کے ساتھ میچز کھیلے گی۔چیئرمین وزیراعظم یوتھ پروگرام رانا مشہود احمد خان نے جوہر ٹان ہاکی سٹیڈیم میں ٹرائلز کی نگرانی کی اور اس موقع پر میڈیا سے بات کرتے ہوئے کہا کہ وزیراعظم نے 2025 کو قومی کھیل ہاکی کی بحالی کا سال قرار دیا ہے، اور کرکٹ کے ساتھ انٹرنیشنل ہاکی کھلاڑیوں کی آمد پاکستان کے لئے خوشی کی بات ہے۔رانا مشہود کا کہنا تھا کہ پاکستان میں کرکٹ اور ہاکی کے تمام بڑے ممالک کے کھلاڑی کھیل رہے ہیں اور انہیں امید ہے کہ بھارت بھی ایک دن پاکستان آکر کھیلے گا۔ انہوں نے مزید کہا کہ ہاکی کی بحالی کا ٹاسک خواجہ جنید اور پرویز سنڈھیلا کو سونپا گیا ہے تاکہ نوجوانوں کو آگے بڑھنے کے مواقع فراہم کیے جا سکیں اور ملک کی ترقی میں مدد مل سکے۔