پی ایس ایل: پی سی بی غیر ملکی کھلاڑیوں پر پیسوں کی برسات کرنے کیلئے تیار

لاہور( سپورٹس ڈیسک)پاکستان کرکٹ بورڈ (پی سی بی) نے پی ایس ایل 10 کے دوران غیر ملکی کھلاڑیوں کو اضافی رقم دینے کا فیصلہ کیا ہے۔پی سی بی پی ایس ایل 10 کھیلنے والے 6 ہائی پروفائل غیر ملکی کھلاڑیوں کو ایک لاکھ ڈالر اضافی ادا کرے گا، جو پی سی بی کے خصوصی فنڈ سے ادا کی جائے گی۔اس سے قبل پی ایس ایل ڈرافٹ کے دوران پی سی بی نے فرنچائزز کے لیے ہر غیر ملکی کھلاڑی کی کم از کم قیمت 2 لاکھ ڈالرز مقرر کی تھی۔پی ایس ایل کی گورننگ کونسل نے چند سال قبل فیصلہ کیا تھا کہ جب سینٹرل پول کا نیٹ براڈکاسٹ ریونیو 3 ارب روپے تک پہنچے گا، تو ایلیٹ کھلاڑیوں کی ادائیگی کے لیے سالانہ پانچ لاکھ ڈالرز مختص کیے جائیں گے۔ پچھلے سال اضافی رقم استعمال نہیں ہوسکی تھی، جس کے باعث یہ رقم بڑھ کر ایک ملین ڈالرز ہو گئی ہے۔پی سی بی نے کہا کہ اس فنڈ کا استعمال کچھ ایلیٹ کھلاڑیوں کی ادائیگی کے لیے کیا جائے گا، جنہوں نے پلیئرز ڈرافٹ کے دوران دستخط کیے تھے۔پی ایس ایل کھیلنے والے غیر ملکی کھلاڑیوں میں ڈیوڈ وارنر، ڈیرل مچل، کین ولیمسن، کوربن بوش، مائیکل بریسویل، رسی وین ڈیر ڈسن، فن ایلن، میتھیو شارٹ، شان ایبٹ، ناہید رانا اور لٹن داس شامل ہیں۔یہ پہلا موقع ہے کہ پی ایس ایل اور انڈین پریمیئر لیگ ایک ہی ونڈو میں منعقد ہو رہی ہیں اور دونوں لیگز اپنے آخری مراحل میں ٹکرائیں گی۔ پی ایس ایل 17 اپریل سے 22 مئی تک جبکہ آئی پی ایل 21 مارچ سے مئی کے آخر تک جاری رہے گی۔یاد رہے کہ گزشتہ دنوں لاہور میں ہونے والے پی ایس ایل 10 کے ڈرافٹ کی تقریب کے دوران کراچی کنگز نے ڈیوڈ وارنر کو 3 لاکھ ڈالر (8 کروڑ 36 لاکھ روپے) کے سب سے زیادہ معاوضے کے ساتھ اپنی ٹیم میں شامل کیا تھا۔