قازقستان میں آذربائیجان کا مسافر طیارہ گر کر تباہ، متعدد ہلاکتوں کا خدشہ

قازقستان( مانیٹرنگ ڈیسک)قازقستان کے شہر اکتا میں آذربائیجان کا مسافر طیارہ گر کر تباہ ہوگیا، جس میں متعدد ہلاکتوں کا خدشہ ہے۔ غیر ملکی خبر ایجنسی کے مطابق، طیارے میں عملے کے 5 ارکان سمیت 72 مسافر سوار تھے۔ حادثے کے بعد 14 مسافروں کو اسپتال منتقل کیا گیا، جن میں سے 4 کی حالت تشویشناک ہے۔ دیگر مسافروں کے بارے میں تاحال کوئی اطلاع نہیں ملی۔طیارہ آذربائیجان کے دارالحکومت باکو سے روس کے زیر تسلط چیچن ریاست کے دارالحکومت گروزنی جا رہا تھا، تاہم دھند کے باعث اس کا راستہ تبدیل کر دیا گیا تھا۔ عینی شاہدین کے مطابق، طیارہ فضا میں پرندوں کے ایک غول سے ٹکرا گیا تھا، لیکن حادثے کی حتمی وجہ ابھی تک معلوم نہیں ہو سکی۔قازقستان کی ہنگامی امور کی وزارت کے مطابق، ایمرجنسی سروسز حادثے کی جگہ پر آگ بجھانے کا عمل جاری رکھے ہوئے ہیں۔ حادثے سے قبل طیارے نے اکتا ایئرپورٹ کے اوپر کئی چکر بھی لگائے تھے۔