خشکی اصل میں کیا ہے؟ اکثر لوگ حقیقت سے ناواقف

لند ن ( ہیلتھ ڈیسک)خشکی ایک عام مسئلہ ہے جو بالوں یا کندھوں پر ظاہر ہوتی ہے، لیکن یہ دراصل سر کی جِلد کی حالت ہے۔ خشکی ایک قسم کی جلد کی سوزش ہوتی ہے اور تحقیق کے مطابق نصف لوگ اپنی زندگی میں کسی نہ کسی وقت اس کا شکار ہوتے ہیں۔ خشکی کی اصل وجہ سر کی جِلد پر جرثوموں کے تناسب کا بگڑنا ہوتا ہے، جسے dysbiosis کہا جاتا ہے۔سر کی جِلد میں مختلف جرثوموں کا قدرتی توازن ہوتا ہے، جسے مائکرو بایوم کہا جاتا ہے۔ جب کچھ خاص قسم کے جرثومے زیادہ بڑھ جاتے ہیں، جیسے ییسٹ اور بیکٹیریا، تو خشکی کی شکایت بڑھ جاتی ہے۔ یہ صورتحال تب زیادہ نظر آتی ہے جب سر میں زیادہ تیل لگایا جائے، کیونکہ اضافی تیل بیکٹیریا اور ییسٹ کو خوراک فراہم کرتا ہے اور خشکی کو بڑھاتا ہے۔ماہر امراضِ جِلد ایمی میک میکل کے مطابق، لوگ اکثر یہ سمجھتے ہیں کہ خشکی اور خارش سر کی خشک جِلد کی وجہ سے ہوتی ہے، اس لیے وہ تیل لگاتے ہیں، لیکن یہ عمل اصل میں خشکی کو مزید بڑھاتا ہے۔ خشکی دراصل ایک چکنائی اور ذرات والی حالت ہوتی ہے، اس لیے تیل کا استعمال نقصان دہ بیکٹیریا اور ییسٹ کے لیے اضافی غذائیت فراہم کرتا ہے۔خشکی سے نجات کے لیے وضع کردہ شیمپو استعمال کرنا چاہیے جو اس کے لیے خاص طور پر تیار کیے گئے ہوں۔ اگر ان کا اثر نہ ہو، تو ڈاکٹر سے مشورہ کرنا ضروری ہے تاکہ وہ آپ کو بہتر علاج تجویز کر سکے۔