پشاور سمیت کئی اضلاع میں تعلیمی ادارے بند، امتحانات بھی ملتوی

پشاور( اباسین خبر) پشاور سمیت خیبر پختونخوا کے بیشتر اضلاع میں آج سرکاری و نجی تعلیمی ادارے، کالج اور جامعات بند رہیں گے۔ذرائع کے مطابق پشاور میں بس تیز رفتار نظام (بی آر ٹی) کی سروس دوسرے روز بھی معطل ہے، جبکہ شہر کی متعدد سڑکیں کنٹینرز لگا کر بند کر دی گئی ہیں۔ متاثرہ راستوں میں باچا خان چوک، خیبر روڈ، فردوس چوک اور ہشت نگری سمیت دیگر مقامات شامل ہیں۔سرکاری ذرائع کے مطابق بنوں تعلیمی بورڈ کے تحت ثانوی تعلیمی سرٹیفکیٹ (ایس ایس سی) کے سالانہ امتحانات کے دوسرے مرحلے کے تمام پرچے ملتوی کر دیے گئے ہیں۔ آج ہونے والا میٹرک کا پرچہ بھی تاحکم ثانی مؤخر کر دیا گیا ہے، جبکہ نئی تاریخوں کا اعلان بعد میں کیا جائے گا۔کوہاٹ میں بھی امتحانات ملتوی کر دیے گئے ہیں، جبکہ لوئر جنوبی وزیرستان اور دیر میں آج تمام تعلیمی ادارے بند رہیں گے۔دوسری جانب ضلع ملاکنڈ میں تعلیمی ادارے آج اور کل بھی بند رہیں گے۔ ضلع میں ۳۰ روز کے لیے دفعہ ۱۴۴ نافذ کر دی گئی ہے۔