’اسپائیڈر مین: برینڈ نیو ڈے‘ کی نئی تفصیلات سامنے، پیٹر پارکر کی زندگی میں بڑے موڑ کا اشارہ

 نیویارک( شو بز ڈیسک)مارول سنیماٹک یونیورس کے مداحوں کے لیے فلم ’’اسپائیڈر مین: برینڈ نیو ڈے‘‘ سے متعلق نئی اور دلچسپ تفصیلات سامنے آئی ہیں، جس میں ٹام ہالینڈ ایک بار پھر پیٹر پارکر کے کردار میں نظر آئیں گے۔نئی معلومات کے مطابق فلم کی کہانی ’’اسپائیڈر مین: نو وے ہوم‘‘ کے واقعات کے بعد شروع ہوتی ہے، جہاں ایک جادوئی عمل کے نتیجے میں دنیا پیٹر پارکر کو بھول چکی ہے۔ اس صورتحال کے بعد پیٹر تنہائی میں زندگی گزار رہا ہے اور خود ساختہ سوٹ کے ساتھ اسپائیڈر مین کے طور پر شہر کی حفاظت کر رہا ہے۔رپورٹس کے مطابق پیٹر پارکر کی مشکلات میں کمی کے بجائے مزید اضافہ ہوگا، کیونکہ وہ اس حقیقت سے نبردآزما ہے کہ اس کے دوست اس کی زندگی سے آگے بڑھ چکے ہیں جبکہ وہ مکمل تنہائی کا شکار ہے۔نئی تفصیلات میں یہ اشارہ بھی دیا گیا ہے کہ پیٹر کی شخصیت میں ایک غیر متوقع تبدیلی رونما ہو سکتی ہے، جس پر اس کا مکمل کنٹرول نہیں ہوگا، جبکہ نیویارک شہر کو ایک ایسے پراسرار خطرے کا سامنا بھی ہو سکتا ہے جس کا ولن نظر نہیں آتا۔کہانی کے مطابق پیٹر پارکر اپنی ذمہ داریوں اور وعدوں کو نبھاتے ہوئے ایک نئے جذباتی سفر سے گزرتا دکھائی دے گا، جس میں اس کی تنہائی اور جدوجہد کو مرکزی حیثیت حاصل ہوگی۔مزید یہ بھی قیاس آرائیاں کی جا رہی ہیں کہ مارول یونیورس میں نئے کردار، ممکنہ طور پر ایکس مین، متعارف کرائے جا سکتے ہیں، تاہم اس کی باضابطہ تصدیق نہیں کی گئی۔اسی طرح فلم کے مرکزی ولن اور دیگر تفصیلات کو فی الحال خفیہ رکھا گیا ہے، جس سے مداحوں میں تجسس مزید بڑھ گیا ہے۔