شدید بارش کے باعث میکسیکو اور انگلینڈ کا اہم مقابلہ ایک گھنٹہ مؤخر

میکسیکو سٹی( سپورٹس ڈیسک)فیفا ورلڈ کپ 2026 کے قبل از کوارٹر فائنل میں میزبان میکسیکو اور انگلینڈ کے درمیان ہونے والا اہم میچ خراب موسمی حالات کے باعث مقررہ وقت پر شروع نہ ہو سکا اور اسے ایک گھنٹے کے لیے مؤخر کر دیا گیا۔عالمی فٹبال تنظیم فیفا نے کھلاڑیوں، شائقین اور میچ آفیشلز کی سلامتی کو ترجیح دیتے ہوئے مقابلہ ملتوی کرنے کا فیصلہ کیا۔ نئے شیڈول کے مطابق یہ میچ پاکستانی وقت کے مطابق صبح چھ بجے شروع ہونا طے پایا۔ذرائع کے مطابق میکسیکو سٹی کے تاریخی ازٹیکا اسٹیڈیم اور اس کے اطراف شدید بارش، گرج چمک اور آسمانی بجلی کے خدشات پیدا ہو گئے تھے۔ انہی خطرات کے پیشِ نظر فیفا نے اپنے موسمی حفاظتی ضوابط پر عمل کرتے ہوئے میچ کے آغاز میں تاخیر کی۔رواں ورلڈ کپ کے دوران موسم کے باعث یہ پہلا واقعہ نہیں۔ اس سے قبل بھی میکسیکو کا ایک ناک آؤٹ مرحلے کا میچ خراب موسم کی وجہ سے تاخیر کا شکار ہوا تھا، جبکہ فرانس کے ایک گروپ مرحلے کے مقابلے کو بھی ناموافق موسمی حالات کے باعث کچھ دیر کے لیے روکنا پڑا تھا۔واضح رہے کہ میکسیکو اور انگلینڈ کے درمیان اس اہم مقابلے کی فاتح ٹیم کوارٹر فائنل میں ناروے کا سامنا کرے گی۔ ناروے نے اپنے گزشتہ میچ میں پانچ بار کی عالمی چیمپئن برازیل کو شکست دے کر ٹورنامنٹ سے باہر کر دیا تھا اور پہلی بار عالمی کپ کے کوارٹر فائنل میں رسائی حاصل کی تھی۔