پنجاب ‘ جیلوں میں نادار قیدیوں کو مفت لیگل ایڈ کی فراہمی کا آغاز

لاہور( اپنے رپورٹر سے)پنجاب بھر کی جیلوں میں نادار قیدیوں کو مفت لیگل ایڈ کی فراہم شروع کر دی گئی۔ترجمان محکمہ داخلہ پنجاب کے مطابق صوبہ بھر کی تمام 43 جیلوں میں فری لیگل ایڈ کمیٹیاں قائم کر دی گئی ہیں، فری لیگل ایڈ کمیٹیاں پنجاب بار کونسل اور ضلعی بار ایسوسی ایشنز کے اشتراک سے تشکیل دی گئی ہیں۔ترجمان کے مطابق نادار اسیران جو مقدمات کی پیروی کیلئے وکیل کا انتظام نہیں کر سکتے انہیں فری لیگل ایڈ ملے گی، مستحق اسیران اپنے متعلقہ سپرنٹنڈنٹ جیل کو درخواست دیں گے جنہیں وکلا ء سے ملوایا جائے گا۔ترجمان کے مطابق پنجاب بھر میں کل 447 وکلا ء کو فری لیگل ایڈ کمیٹیوں میں شامل کیا گیا ہے، لاہور ڈویژن میں 45، گوجرانوالہ ڈویژن میں 90، راولپنڈی میں 70 وکلا شامل ہیں۔اسی طرح فیصل آباد ڈویژن میں 47، ملتان میں 45، سرگودھا میں 24 وکلا کمیٹیوں میں شامل ہیں جبکہ بہاولپور ڈویژن سے 55، ساہیوال سے 55، ڈی جی خان سے 16 وکلا ء کو فری لیگل ایڈ کمیٹی میں شامل کیا گیا ہے۔