محکمہ موسمیات کی پیشگوئی، جنوبی حصوں میں گرمی کی لہر اور بالائی علاقوں میں بارشوں کا امکان

لاہور( اباسین خبر)محکمہ موسمیات نے ملک کے جنوبی حصوں میں ہیٹ ویو (گرمی کی لہر) جیسی صورتحال اور بالائی علاقوں میں بارشوں کی پیشگوئی کی ہے۔ محکمہ کے مطابق، 8 اپریل سے مغربی ہواں کا نیا سلسلہ ملک کے بالائی حصوں میں داخل ہوگا، جس کے نتیجے میں 8 سے 11 اپریل کے دوران چترال، دیر، سوات، شانگلہ، کوہستان، مانسہرہ، ایبٹ آباد، بٹگرام، بونیر، باجوڑ اور گلگت بلتستان میں بارشیں متوقع ہیں۔اس کے علاوہ، خطہ پوٹھوہار، اسلام آباد، راولپنڈی، جہلم، چکوال، تلہ گنگ، میانوالی اور شمال مشرقی پنجاب میں بھی بارشوں کا امکان ہے۔ محکمہ موسمیات نے خبردار کیا ہے کہ خیبرپختونخوا، پنجاب اور بالائی سندھ کے میدانی علاقوں میں گرد آلود ہوائیں چلنے کا امکان ہے، جبکہ وسطی و جنوبی پنجاب، سندھ اور بلوچستان کے کچھ حصوں میں درجہ حرارت معمول سے 4 سے 7 ڈگری سینٹی گریڈ زیادہ رہنے کی توقع ہے۔شہریوں کو غیر ضروری طور پر دھوپ میں نکلنے سے گریز کرنے اور پانی کا زیادہ استعمال کرنے کی ہدایت دی گئی ہے۔ کاشت کاروں کو بھی مشورہ دیا گیا ہے کہ وہ اپنی زرعی سرگرمیاں موسمی حالات کو مدنظر رکھتے ہوئے ترتیب دیں۔