ہالی وڈ کے اسٹار ویل کلمر 65 سال کی عمر میں انتقال کر گئے، مداح اور ساتھی اداکار سوگوار

واشنگٹن ( شوبز ڈیسک)ہالی وڈ کے مشہور اداکار ویل کلمر، جنہوں نے فلموں “بیٹ مین فار ایور” اور “ٹاپ گن” میں اپنے آئیکونک کردار ادا کیے، 65 برس کی عمر میں انتقال کر گئے۔ویل کلمر طویل عرصے سے صحت کے مسائل کا شکار تھے، اور بالآخر لاس اینجلس میں نمونیا کی وجہ سے دنیا سے رخصت ہوگئے۔ 2014 میں انہیں گلے کے کینسر کی تشخیص ہوئی تھی اور اس دوران ان کی سرجری ہوئی تھی، جس میں ٹریکیوٹومی بھی شامل تھی۔ اس کے نتیجے میں ان کی آواز متاثر ہوگئی، لیکن بعد میں ڈاکٹروں نے انہیں کینسر سے پاک قرار دے دیا تھا۔ویل کلمر نے 1986 کی فلم “ٹاپ گن” میں آئس مین کا کردار ادا کیا، جس نے انہیں عالمی شہرت دی۔ اسی طرح 1995 میں “بیٹ مین فار ایور” میں بیٹ مین کے کردار میں نظر آئے، اور 1991 کی فلم “دی ڈورز” میں موسیقار جم موریسن کا کردار بھی نبھایا، جو ان کے کیریئر کا ایک سنگ میل تھا۔2022 میں، وہ “ٹاپ گن میورک” میں اپنی آواز کے مسائل کے باوجود ایک مختصر کردار میں نظر آئے اور اپنے مداحوں کے دل جیت لیے۔ویل کلمر نے اپنی بیماری کے دوران بھی ہمت نہیں ہاری اور اپنی جدوجہد کو دستاویزی فلم میں تبدیل کیا، جس میں ان کے بیٹے جیک کلمر نے وائس اوور فراہم کیا، لیکن اس کے مکالمے خود ویل کلمر نے تحریر کیے تھے۔ویل کلمر کی وفات کی خبر پر ان کے مداحوں اور ساتھی اداکاروں میں گہرا صدمہ پایا جا رہا ہے۔