مہنگائی کیخلاف درخواست، لاہور ہائیکورٹ میںپنجاب حکومت کو جواب جمع کرانے کیلئے مزید مہلت مل گئی

لاہور( اباسین خبر)لاہور ہائیکورٹ میں مہنگائی کے خلاف درخواست پر پنجاب حکومت نے جواب جمع کرانے کے لیے مہلت مانگ لی۔لاہور ہائیکورٹ کے جسٹس شاہد کریم نے رمضان المبارک کے دوران چینی اور دیگر اشیائے خورونوش کی قیمتوں میں اضافے کے خلاف درخواست کی سماعت کی۔ درخواست میں جوڈیشل ایکٹوزم پینل کی جانب سے اظہر صدیق ایڈووکیٹ نے پیش ہو کر موقف اختیار کیا۔دوران سماعت صوبائی حکومت کے وکیل نے عدالت سے جواب جمع کرانے کے لیے مزید وقت کی استدعا کی۔ جس پر عدالت نے ریمارکس دیے کہ رمضان تقریبا گزر چکا ہے، حکومت کیوں رولز پر عملدرآمد نہیں کر رہی؟ جسٹس شاہد کریم نے کہا کہ حکومت کے پاس تمام وسائل موجود ہیں پھر بھی قیمتوں کو کنٹرول نہیں کیا جا رہا۔عدالت نے پنجاب حکومت کے وکیل کی استدعا منظور کرتے ہوئے جواب جمع کرانے کے لیے مہلت دے دی۔