زیبا بختیار نے تیسری بار شادی نہ کرنے کی وجہ بتادی، زندگی کے مختلف پہلوں پر اہم انکشاف

کراچی ( شوبز ڈیسک)پاکستان کی خوبرو سابقہ اداکارہ زیبا بختیار نے تیسری بار شادی نہ کرنے کی وجہ بتا دی ہے۔ حال ہی میں ایک انٹرویو میں زیبا بختیار نے اپنے شوبز کیرئیر، ماضی کی شادیوں، بیٹے کی پرورش اور صحت کے مسائل پر کھل کر بات کی۔زیبا بختیار نے بھارت میں کام کرنے کے حوالے سے انکشاف کیا کہ جب وہ بھارت گئی تھیں تو پاکستانی میڈیا اور صحافیوں نے ان کے خلاف پروپیگنڈا کیا تھا، اور خبریں پھیلائی تھیں کہ وہ وہاں فلموں میں کام کریں گی اور قابل اعتراض مناظر شوٹ کریں گی۔ تاہم، زیبا نے کہا کہ وہ کبھی نہیں چاہتی تھیں کہ وہ ہمیشہ اداکاری کرتی رہیں، لیکن جب شوبز میں قدم رکھا تو کام جاری رکھنے کا ارادہ کیا۔انہوں نے پہلی بار انکشاف کیا کہ اپنی بالی وڈ فلم ‘حنا’ کی ریلیز کے بعد انہیں ذیابیطس کی تشخیص ہوئی۔ زیبا نے بتایا کہ ان کے خاندان میں کسی کو بھی ذیابیطس نہیں تھی، اور جب انہیں اس بیماری کا پتا چلا تو وہ بہت پریشان ہوگئیں۔پاکستان میں سماجی توقعات پر بات کرتے ہوئے زیبا بختیار نے کہا کہ ہیروئنز کو سماجی طور پر یہ تاثر دیا جاتا ہے کہ ان کی شادی نہیں ہوتی اور نہ ہی ان کے بچے ہوتے ہیں۔ وہ صرف اس وقت تک ہیروئن رہتی ہیں جب تک وہ غیر شادی شدہ ہوں، اور انہوں نے کئی کامیاب ہیروئنز کو دیکھا ہے جن کا کیرئیر شادی کے بعد ختم ہو گیا۔گلوکار عدنان سمیع خان سے اپنی شادی کے بارے میں بات کرتے ہوئے زیبا نے کہا کہ وہ دونوں پہلے دوست تھے اور انہیں امید نہیں تھی کہ شادی کے بعد ان کے درمیان مسائل پیدا ہوں گے۔ ان کی شادی ایک سال تک رہی تھی، بیٹے کی پیدائش ہوئی، اور پھر طلاق ہوگئی، جس کے بعد زیبا نے اپنے بیٹے کی کفالت کے لیے قانونی جنگ بھی لڑی۔جب ان سے دوبارہ شادی کے بارے میں سوال کیا گیا تو زیبا نے واضح طور پر کہا کہ ان کا یہ فیصلہ نہیں تھا کہ انہوں نے اپنے بیٹے کی خاطر دوبارہ شادی نہیں کی، بلکہ حقیقت یہ ہے کہ اگر انہیں زندگی کا ساتھی ملتا تو وہ ضرور شادی کر لیتی، مگر ایسا شخص کبھی نہیں ملا۔یاد رہے کہ جولائی 2024 میں آمنہ حیدر عیسانی کے ساتھ ایک انٹرویو میں زیبا بختیار نے انکشاف کیا تھا کہ عدنان سمیع خان سے ان کی دوسری شادی تھی اور ان کی پہلی شادی شوبز میں آنے سے 19 سال قبل ہوئی تھی۔ انہوں نے بتایا تھا کہ ان کی پہلی شادی بھی ایک سال بعد طلاق پر ختم ہوگئی، جس کے بعد وہ شوبز میں آئی تھیں اور عدنان سمیع خان سے دوسری شادی کی تھی، لیکن یہ شادی بھی طلاق پر ختم ہوگئی۔