حارث رئوف کا سابق کرکٹرز پر غصہ،ڈومیسٹک کرکٹ سے سیدھا انٹرنیشنل سطح پر پرفارم کرنا مشکل ہوتا ہے،پریس کانفرنس

ڈونیڈن( سپورٹس ڈیسک)نیوزی لینڈ کے ہاتھوں دوسرے ٹی20 انٹرنیشنل میں شکست کے بعد فاسٹ بالر حارث رئوف نے اپنے غصے کا اظہار سابق کرکٹرز پر کیا۔پریس کانفرنس میں حارث رئوف نے کہا کہ پاکستان میں لوگ ٹیم کے ہارنے کا انتظار کرتے ہیں تاکہ تنقید کر سکیں۔ انہوں نے کہا کہ نیوزی لینڈ کی کنڈیشنز آسان نہیں ہیں، اور ہر کھلاڑی اپنے 100 فیصد کھیل کی کوشش کر رہا ہے۔حارث رئوف نے مزید کہا کہ کیوی بیٹرز نے اچھے شارٹس کھیلے اور کچھ قسمت نے ان کا ساتھ دیا۔ ہم وہ کرکٹ کھیلنے کی کوشش کر رہے ہیں جو جدید کرکٹ کا تقاضا ہے۔ایک سوال کے جواب میں حارث نے کہا کہ نوجوان کھلاڑیوں کو سپورٹ نہیں کیا جائے گا تو کیسے آگے بڑھ سکتے ہیں؟ ان کھلاڑیوں کو پاکستان کی طرف سے کھیلنے کا موقع ملا ہے اور انہیں وقت دینا چاہیے۔انہوں نے یہ بھی کہا کہ ڈومیسٹک کرکٹ سے سیدھا انٹرنیشنل سطح پر پرفارم کرنا مشکل ہوتا ہے، اور انہیں کنڈیشنز کو سمجھنے اور پریشر میں پرفارم کرنے کے لیے وقت دیا جانا چاہیے۔واضح رہے کہ نیوزی لینڈ نے دوسرے ٹی20 میچ میں پاکستان کو 5 وکٹوں سے شکست دے کر سیریز میں 0-2 کی برتری حاصل کر لی ہے۔