ٹیم ناکامی سے سبق سیکھ کر آگے بڑھے،امید ہے ٹیم اگلے میچ میں بہتر کارکردگی دکھائے گی: سلمان علی آغا

لاہور( سپورٹس ڈیسک)پاکستان ٹی ٹوئنٹی کرکٹ ٹیم کے کپتان سلمان علی آغا نے نیوزی لینڈ کے خلاف پہلے ٹی ٹوئنٹی میچ میں شکست کے بعد ٹیم کو اہم مشورہ دیا ہے۔ میچ کے بعد اپنے بیان میں انہوں نے تسلیم کیا کہ یہ ان کے لیے ایک مشکل دن تھا، لیکن انہوں نے کہا کہ ٹیم کو اس ناکامی سے سبق سیکھ کر آگے بڑھنا ہوگا۔سلمان آغا نے مزید کہا کہ اگلے میچ میں ٹیم بھرپور کم بیک کرے گی اور نیوزی لینڈ کی طرح نئی گیند کا موثر استعمال کرنے کی کوشش کرے گی۔ انہوں نے امید ظاہر کی کہ ٹیم اپنے اگلے میچ میں بہتر کارکردگی دکھائے گی۔گزشتہ روز، نیوزی لینڈ نے شاندار کارکردگی کا مظاہرہ کرتے ہوئے پاکستان کو یکطرفہ مقابلے میں 9 وکٹوں سے شکست دی۔ نیوزی لینڈ کے کپتان مائیکل بریسویل نے اپنی ٹیم کی کارکردگی کو سراہتے ہوئے کہا کہ یہ ایک زبردست دن تھا اور خاص طور پر کائل جیمیسن اور جیکب ڈفی کی بولنگ دیکھنا خوشگوار تجربہ تھا۔مائیکل بریسویل نے مزید کہا کہ ان کی ٹیم اگلے میچز میں بھی اسی جذبے اور محنت سے کھیلے گی۔میچ کے بہترین کھلاڑی کا اعزاز نیوزی لینڈ کے فاسٹ بولر کائل جیمیسن کو دیا گیا، جنہوں نے شاندار بولنگ کا مظاہرہ کیا۔ کائل جیمیسن نے کہا کہ کنڈیشنز ان کے لیے سازگار ثابت ہوئیں اور ٹیم کو جلد برتری حاصل کرنے میں مدد ملی۔ انہوں نے کہا کہ یہ ایک بہترین ٹیم ورک تھا اور خاص طور پر جیکب ڈفی کی کارکردگی بھی شاندار تھی، ان کے ساتھ بولنگ کرنا ایک زبردست تجربہ تھا۔