امریکہ میں شدید طوفانی ہواوں اور آندھیوں سے 40 سے زائد افراد ہلاک، درجنوں زخمی

واشنگٹن( مانیٹرنگ ڈیسک)شدید طوفانی ہواوں اور آندھیوں نے امریکا کے وسطی اور جنوبی علاقوں کو لپیٹ میں لے لیا، جس کے نتیجے میں 40 سے زائد افراد ہلاک اور درجنوں زخمی ہوگئے۔امریکی میڈیا کے مطابق، امریکی ریاست میسوری طوفان سے سب سے زیادہ متاثر ہوئی، جہاں 12 افراد ہلاک ہوئے۔ اسی طرح، امریکی ریاستوں ٹیکساس اور آرکنساس میں طوفانی بگولوں نے 12 افراد کی جانیں لیں۔ امریکی صدر ڈونلڈ ٹرمپ نے آرکنساس میں نیشنل گارڈ کو امدادی کارروائیوں کے لیے بھیج دیا ہے۔میڈیا رپورٹس کے مطابق، امریکی ریاست اوکلاہوما میں طوفانی بگولوں کے سبب جنگلات میں 150 سے زائد مقامات پر آگ بھڑک اٹھی، جس سے مزید مشکلات پیدا ہو گئیں۔ اس طوفان کی وجہ سے 8 امریکی ریاستوں میں 3 لاکھ 20 ہزار سے زائد گھر بجلی سے محروم ہو گئے۔امریکی محکمہ موسمیات نے پیشگوئی کی ہے کہ ریاست مسیسپی، مشرقی لوزیانا اور مغربی ٹینیسی بھی طوفان کی زد میں آ سکتے ہیں، اور ان علاقوں میں مزید تباہی کا خدشہ ہے۔