نئی دہلی( مانیٹرنگ ڈیسک)بھارتی کرکٹ بورڈ (بی سی سی آئی) نے انگلش کرکٹر ہیری بروک پر آئی پی ایل میں شرکت کرنے پر 2 سال کی پابندی عائد کر دی ہے۔ بھارتی میڈیا کی رپورٹ کے مطابق یہ پابندی اس وقت عائد کی گئی جب ہیری بروک نے ٹورنامنٹ شروع ہونے سے پہلے آخری لمحوں میں دستبردار ہونے کا فیصلہ کیا تھا۔آئی پی ایل کے نئے قانون کے تحت اگر کوئی غیر ملکی کھلاڑی نیلامی میں رجسٹر ہو کر فرنچائز کے ذریعے خریدے جانے کے بعد سیزن کے آغاز سے پہلے ٹورنامنٹ سے دستبردار ہوتا ہے، تو اس پر 2 سیزن تک آئی پی ایل میں شرکت پر پابندی عائد کی جاتی ہے۔بی سی سی آئی کی جانب سے ہیری بروک اور انگلینڈ اینڈ ویلز کرکٹ بورڈ کو اس فیصلے سے آگاہ کر دیا گیا ہے۔ گزشتہ دنوں ہیری بروک نے رواں ماہ شروع ہونے والے آئی پی ایل کے 18 ویں سیزن سے دستبردار ہونے کا اعلان کیا تھا، اور کہا تھا کہ وہ اپنی تمام تر توجہ بین الاقوامی کرکٹ پر مرکوز رکھنا چاہتے ہیں۔ہیری بروک نے سوشل میڈیا پر بیان جاری کرتے ہوئے کہا تھا، “میں نے بہت مشکل فیصلہ کیا ہے کہ میں اس سال آئی پی ایل کے سیزن میں حصہ نہیں لوں گا، اور دہلی کیپیٹلز سے معذرت خواہ ہوں۔”یاد رہے کہ دہلی کیپیٹلز نے ہیری بروک کو آئی پی ایل 2025 کے لیے خریدا تھا، اور انہوں نے گزشتہ سیزن میں بھی دہلی کی ٹیم سے اپنا معاہدہ منسوخ کر دیا تھا۔ آئی پی ایل کا 18 واں سیزن 22 مارچ سے شروع ہو رہا ہے۔
یری بروک کی آئی پی ایل 2025 میں دہلی کیپیٹلز سے معذرت، 2 سال کی پابندی کا سامنا
3
