پنجاب صوفیا، محبت اور رواداری کی دھرتی ہے، یہاںسب کو یکساں حقوق و مواقع میسر ہیں: مریم نواز

لاہور( اباسین خبر) وزیراعلی پنجاب مریم نواز نے کہا ہے کہ اقلیتوں کے جان و مال کے تحفظ کو ریڈ لائن قرار دے کر یقینی بنایا جا رہا ہے۔ ہندو برادری کے تہوار ہولی کے موقع پر پیغام جاری کرتے ہوئے انہوں نے کہا کہ “رنگوں کا یہ خوبصورت تہوار ہولی محبت، امن اور بھائی چارے کی علامت ہے۔” مریم نواز نے مزید کہا کہ “پاکستان مختلف مذاہب کی برادریوں کا حسین امتزاج ہے، اور سب کو یکساں حقوق و مواقع میسر ہیں۔”وزیراعلی پنجاب نے اس عزم کا اظہار کیا کہ وہ ایسا پنجاب بنائیں گی جہاں ہر شہری خود کو محفوظ، بااختیار اور برابر کا پاکستانی محسوس کرے۔ انہوں نے کہا کہ “پنجاب صوفیا، محبت اور رواداری کی دھرتی ہے، یہاں ہر مذہب اور برادری کو مکمل احترام حاصل ہے۔”مریم نواز نے کہا کہ حکومت پنجاب اقلیتوں کے تحفظ اور فلاح و بہبود کے لیے عملی اقدامات کر رہی ہے، جن میں اقلیتی برادری کو تعلیم، صحت، روزگار اور دیگر بنیادی سہولتیں یکساں طور پر فراہم کرنا شامل ہے۔ انہوں نے بتایا کہ “مونیاریٹی کارڈ کے ذریعے نادار اقلیتی بہن بھائیوں کی مدد کی جا رہی ہے اور مذہبی تہواروں کے لیے گرانٹس میں اضافہ کیا گیا ہے۔