پاکستان کبڈی فیڈریشن کی جنرل کونسل میٹنگ، بھارت کو کبڈی ٹورنامنٹ میں شرکت کی دعوت

لاہور( سپورٹس ڈیسک)پاکستان کبڈی فیڈریشن کی جنرل کونسل میٹنگ فیڈریشن کے صدر اور صوبائی وزیر صنعت و تجارت چوہدری شافع حسین کی صدارت میں ہوئی، جس میں رواں سال کے کبڈی ایونٹس کے لیے بجٹ کی منظوری دی گئی۔چوہدری شافع حسین نے اجلاس میں بتایا کہ رواں سال اپریل میں تین ملکی کبڈی ٹورنامنٹ کا انعقاد کیا جائے گا جس میں پاکستان، بھارت اور ایران کی کبڈی ٹیمیں حصہ لیں گی۔ انہوں نے کہا کہ اس ایونٹ کا مقصد ممالک کے باہمی تعلقات کو فروغ دینا ہے اور اسپورٹس کلیدی کردار ادا کرتے ہیں۔چوہدری شافع حسین نے افسوس کا اظہار کرتے ہوئے کہا کہ بھارت کی حکومت کی جانب سے اپنی کبڈی ٹیمیں پاکستان بھیجنے میں رکاوٹ ڈالی جاتی ہے۔ تاہم، انہوں نے امید ظاہر کی کہ کوششوں کے ذریعے بھارت کی کبڈی ٹیم اس بار ایونٹ میں ضرور شرکت کرے گی، جس سے دونوں ممالک کے درمیان تعلقات میں بہتری آ سکے گی۔