پنجاب حکومت کی بڑی کارروائی: نادرا کو اسلحہ لائسنسز کی آن لائن تصدیق کے لیے کیو آر کوڈ جاری کرنے کی ہدایت

لاہور( اباسین خبر)محکمہ داخلہ پنجاب نے نادرا کو اسلحہ لائسنسز کی آن لائن تصدیق کے لیے کیو آر کوڈ جاری کرنے کی ہدایت کر دی۔ترجمان محکمہ داخلہ پنجاب کے مطابق، سیکرٹری داخلہ نورالامین مینگل کی زیرِ صدارت اسلحہ لائسنس کی تصدیق سے متعلق ایک اہم اجلاس ہوا، جس میں سپیشل سیکرٹری داخلہ فضل الرحمان، ایڈیشنل سیکرٹری داخلہ (جوڈیشل) عمران حسین رانجھا اور نادرا حکام شریک ہوئے۔ اجلاس میں اسلحہ لائسنسز سے متعلق نادرا حکام کے ساتھ اہم فیصلے کیے گئے۔سیکرٹری داخلہ نے نادرا کو اسلحہ لائسنسز پر کیو آر کوڈ لگانے کے لیے ایک ہفتے کا وقت دیا اور اسلحہ لائسنسز کو متعلقہ شخص کے شناختی کارڈ سے لنک کرنے کی ہدایت کی۔ پنجاب کے کمشنرز اور ڈپٹی کمشنرز کو بھی اسلحہ لائسنسز کے تمام آرڈرز پر کیو آر کوڈ دینے کی ہدایت کی گئی۔نورالامین مینگل نے کہا کہ اس نئے تصدیقی عمل سے جعلی لائسنسز کا خاتمہ ہوگا اور سنگین جرائم میں ملوث افراد اسلحہ لائسنس حاصل کرنے کے قابل نہیں ہوں گے۔ انہوں نے مزید کہا کہ آرمز رولز میں ترامیم کر کے شہریوں کو سہولت فراہم کی جا رہی ہے، اور اسلحہ لائسنس کی تصدیق کے لیے ڈائریکٹوریٹ آف مانیٹرنگ کا کردار بڑھایا جا رہا ہے۔