جعفر ایکسپریس پر دہشتگردوں کے حملے کے بعد پاکستان ریلوے نے ٹرین سروس معطل کر دی

کو ئٹہ ( اباسین خبر)پاکستان ریلوے نے کوئٹہ سے اندرونِ ملک جانے والی بولان میل اور جعفر ایکسپریس کو تین روز کے لیے معطل کر دیا ہے۔ ریلوے حکام کے مطابق یہ فیصلہ بولان میں جعفر ایکسپریس پر دہشت گردوں کے حملے کے بعد کیا گیا۔ریلوے حکام نے بتایا کہ کوئٹہ سے چمن جانے والی پسنجر ٹرین بھی تاحال روانہ نہیں کی گئی ہے۔یاد رہے کہ گزشتہ روز کچھی بولان میں پنیر ریلوے اسٹیشن کے قریب دہشت گردوں نے کوئٹہ سے پشاور جانے والی جعفر ایکسپریس پر حملہ کر دیا تھا۔ دہشت گردوں نے ٹرین کو ہائی جیک کرنے کے بعد 400 مسافروں کو یرغمال بنا لیا تھا۔ ٹرین کے سبی کے قریب پہنچنے پر دہشت گردوں نے ٹریک دھماکے سے اڑا دیا، جس کے بعد پہاڑوں سے اندھا دھند فائرنگ کی گئی، جس کے نتیجے میں ٹرین کا ڈرائیور زخمی ہو گیا۔زخمی ڈرائیور ٹرین کو واپس سرنگ میں لے گیا، جس کے بعد دہشت گردوں نے دونوں اطراف سے ٹرین کو گھیر کر یرغمال بنا لیا۔ فورسز کا 4 گن شپ ہیلی کاپٹرز کے ساتھ آپریشن جاری ہے، جس میں اسپیشل کمانڈوز بھی شریک ہیں۔ آپریشن میں 16 دہشت گردوں کو ہلاک کر دیا گیا ہے، جبکہ خواتین اور بچوں سمیت 104 مسافروں کو بازیاب کر لیا گیا ہے۔