کولوریکٹل کینسر کی بڑھتی ہوئی شرح: ماہرین کی تشویش اور بچا کے تدابیر

کراچی ( ہیلتھ ڈیسک)ماہرین نے خبردار کیا ہے کہ کولوریکٹل کینسر کے کیسز مردوں اور عورتوں دونوں میں عالمی سطح پر تیزی سے بڑھ رہے ہیں، جو صحت عامہ کے لیے ایک سنگین تشویش بن چکا ہے۔ سندھ میڈیکل کالج اور جناح پوسٹ گریجویٹ میڈیکل سینٹر کی جانب سے منعقد کی جانے والی ایک تقریب میں ماہرین نے اس بیماری کے بڑھتے ہوئے کیسز پر گہری تشویش کا اظہار کیا۔ماہرین کے مطابق، کولوریکٹل کینسر دنیا بھر میں تیسرے نمبر پر سب سے عام کینسر ہے، جو کینسر کے تمام کیسز کا تقریبا 10 فیصد بناتا ہے۔ یہ کینسر عالمی سطح پر کینسر سے ہونے والی اموات کی دوسری بڑی وجہ ہے۔یہ بیماری بنیادی طور پر بزرگ افراد کو متاثر کرتی ہے، اور اس کے زیادہ تر کیسز 50 سال یا اس سے زیادہ عمر کے افراد میں دیکھے جاتے ہیں۔ تاہم، ماہرین نے اس بات پر زور دیا کہ بچا کی بنیادی حکمت عملیوں کو اپنانا جیسے کہ صحت مند طرز زندگی، خطرے کے عوامل سے بچنا اور باقاعدہ اسکریننگ کے ذریعے بیماری کا جلد پتہ لگانا اس بیماری کو نمایاں طور پر کم کرنے میں مددگار ثابت ہو سکتا ہے۔ماہرین کی جانب سے یہ تجویز کی گئی کہ کولوریکٹل کینسر کے بڑھتے ہوئے کیسز سے نمٹنے کے لیے آگاہی بڑھانی ضروری ہے اور لوگوں کو اس بیماری کے علامات اور اس کے ممکنہ خطرات سے متعلق آگاہ کیا جائے۔