رمضان میں ہی مشترکہ لائحہ عمل عوام کے سامنے پیش کیا جائیگا: جے یو آئی اور پی ٹی آئی کااعلا میہ

اسلام آباد( اباسین خبر)پاکستان تحریک انصاف (پی ٹی آئی) اور جمعیت علمائے اسلام (جے یو آئی) میں مشترکہ لائحہ عمل لانے پر اتفاق ہوگیا۔پی ٹی آئی اور جے یو آئی کے رہنماں کے درمیان اہم اجلاس ہوا، جس کے بعد مشترکہ اعلامیہ جاری کیا گیا۔ اعلامیے کے مطابق، بانی پی ٹی آئی عمران خان اور مولانا فضل الرحمان سے مشاورت کے بعد رواں ماہ حتمی لائحہ عمل عوام کے سامنے لانے پر اتفاق کیا گیا۔اجلاس میں پی ٹی آئی کی جانب سے سلمان اکرم راجہ، اسد قیصر، جنید اکبر، عاطف خان، عامر ڈوگر اور اخونزادہ حسین یوسفزئی نے شرکت کی، جبکہ جے یو آئی کی طرف سے مولانا عبدالغفور حیدری اور سینیٹر کامران مرتضی شریک ہوئے۔ذرائع کے مطابق، دونوں جماعتوں نے مستقبل میں ایک دوسرے کے ساتھ چلنے کے حوالے سے مشترکہ لائحہ عمل اختیار کرنے پر غور کیا۔ اعلامیے میں کہا گیا کہ ملاقات خوشگوار ماحول میں ہوئی، اور اس پر اتفاق کیا گیا کہ رمضان کے دوران مشترکہ لائحہ عمل عوام کے سامنے پیش کیا جائے گا۔