آئی ایم ایف سندھ حکومت کی معاشی کارکردگی کا معترف

اسلام آباد( کامرس ڈیسک) عالمی مالیاتی ادارے (آئی ایم ایف) نے صوبہ سندھ کی معاشی کارکردگی کو سراہا ہے۔ ذرائع کے مطابق، آئی ایم ایف کے وفد سے ملاقات میں سیکرٹری خزانہ فیاض جتوئی نے سندھ کی گزشتہ 8 ماہ کی کارکردگی کا جائزہ پیش کیا۔سیکرٹری خزانہ نے آئی ایم ایف وفد کو بریفنگ دیتے ہوئے بتایا کہ سندھ نے رواں مالی سال کی پہلی ششماہی میں 264 ارب روپے کا سرپلس دکھایا ہے۔ انہوں نے سندھ ریونیو بورڈ کی کارکردگی کے بارے میں بھی آئی ایم ایف کو آگاہ کیا اور صوبے میں زرعی انکم ٹیکس کی پیچیدگیوں کو بتایا۔ آئی ایم ایف نے سندھ میں سنگل سیلز ٹیکس گوشوارے کی کارکردگی کو سراہا۔مزید بریفنگ میں بتایا گیا کہ زرعی انکم ٹیکس کا ریٹ 2024 کے جولائی سے دسمبر تک اور جنوری 2025 سے جون 2025 تک مختلف ہوگا۔آئی ایم ایف نے سندھ کو تعلیم اور صحت عامہ کے شعبوں میں فنڈز بڑھانے کا مشورہ دیا اور پینے کے پانی کی کوالٹی اور پسماندہ اضلاع میں معیار زندگی بہتر بنانے کے لیے فنڈز بڑھانے کی ضرورت پر زور دیا۔