پشاور ہائی کورٹ، افتخار مشوانی کو کسی بھی مقدمے میں گرفتار نہ کرنے کا حکم

پشاور( اباسین خبر)پشاور ہائی کورٹ نے پاکستان تحریک انصاف (پی ٹی آئی) کے رکن صوبائی اسمبلی افتخار مشوانی کو کسی بھی مقدمے میں گرفتار نہ کرنے کا حکم دے دیا۔افتخار مشوانی کی مقدمات کی تفصیل کے لیے دائر درخواست پر پشاور ہائیکورٹ کے جسٹس صاحب زادہ اسد اللہ اور جسٹس اورنگزیب خان نے سماعت کی۔ عدالت نے افتخار مشوانی کو 15 اپریل تک حفاظتی ضمانت دیتے ہوئے کسی بھی درج مقدمے میں گرفتار نہ کرنے کا حکم دیا۔عدالت نے وزارت داخلہ سمیت متعلقہ فریقین سے رپورٹ طلب کی اور درخواست گزار کے وکیل نے موقف اختیار کیا کہ درخواست گزار رکن اسمبلی ہیں اور وہ اومنی بس کے حوالے سے مسائل کو حل کرنا چاہتے ہیں۔ جسٹس صاحب زادہ اسد اللہ نے کہا کہ ایف آئی اے اور نیب کی تفصیلات آچکی ہیں، جبکہ وزارت داخلہ کی رپورٹ ابھی آنا باقی ہے جس کے لیے خط لکھا جا چکا ہے۔عدالت نے مزید سماعت 15 اپریل تک ملتوی کرتے ہوئے وزارت داخلہ سمیت متعلقہ فریقین سے رپورٹ طلب کرلی۔