افغانستان سے وفاق نہ خود اور نہ ہمیں بات کرنے دے رہا ہے:بیرسٹر ڈاکٹر سیف

پشاور( اباسین خبر) مشیر اطلاعات خیبرپختونخوا بیرسٹر ڈاکٹر سیف نے کہا ہے کہ دہشتگردی پر قابو پانے کے لیے افغانستان سے بات چیت ضروری ہے۔اپنے بیان میں انہوں نے کہا کہ وفاق نہ تو خود افغانستان سے بات کر رہا ہے اور نہ ہی ہمیں بات کرنے کی اجازت دے رہا ہے۔ وفاق نے افغانستان سے بات چیت کے لیے طے شدہ ٹی او آرز کو نظر انداز کر دیا ہے۔بیرسٹر سیف نے کہا کہ وفاق کو تماشا دیکھنے کے بجائے دہشتگردی کے خلاف ٹھوس حکمت عملی اپنانا چاہیے۔ خیبرپختونخوا کے عوام اور سکیورٹی فورسز قربانیاں دے رہے ہیں، اور دہشتگردی صرف کے پی کا نہیں بلکہ پورے ملک کا مسئلہ ہے۔ انہوں نے دہشتگردی کے قومی مسئلے کے حل کے لیے قومی یکجہتی کی ضرورت پر زور دیا۔بیرسٹر سیف نے مزید کہا کہ دہشتگردی کو روکنے کے لیے اندرونی اور بیرونی سطح پر عملی اقدامات کیے جائیں، اور کے پی حکومت دہشتگردی کے بڑھتے ہوئے واقعات پر شدید تشویش کا اظہار کر رہی ہے۔