ہنگو: بل کی عدم ادائیگی پر اسپتال کی بجلی منقطع

ہنگو( اباسین خبر) پیسکو نے کئی ماہ سے بل کی عدم ادائیگی کے باعث ڈسٹرکٹ ہیڈ کوارٹر اسپتال کی بجلی منقطع کر دی۔ایم ایس ڈی ایچ کیو ہنگو نے بتایا کہ ہر ماہ بل جمع کرانے کے باوجود پیسکو نے بغیر کسی نوٹس کے اسپتال کی بجلی لائن منقطع کر دی۔ انہوں نے مزید کہا کہ رات کے وقت بجلی کی عدم دستیابی کے سبب مریضوں کا علاج موبائل ٹارچ کی مدد سے کیا گیا۔ایم ایس ہنگو نے یہ بھی وضاحت کی کہ اسپتال کے قریب پولیس لائن کے بل کا بوجھ بھی اسپتال پر ہے۔ اس حوالے سے ڈی ایس پی پولیس لائن نے کہا کہ پولیس لائن ہنگو کو بجلی کے دو میٹرز لگے ہوئے ہیں اور مارچ میں 24 لاکھ روپے کا بل جمع کیا گیا ہے، ان کے اوپر کوئی بقایاجات نہیں ہیں۔ایس ڈی او پیسکو مہتاب خان نے ایم ایس ڈی ایچ کیو کے الزامات کی تردید کرتے ہوئے کہا کہ اسپتال پر تین ماہ کے بقایا جات ہیں اور ٹھوس جواب نہ ملنے پر بجلی منقطع کی گئی تھی، تاہم فی الحال اسپتال کی بجلی بحال کر دی گئی ہے۔