سکیورٹی کی خراب صورتحال: وفاقی و صوبائی حکومت کو نوٹس

پشاور( اباسین خبر) خیبرپختونخوا کے جنوبی اضلاع میں سکیورٹی کی خراب صورتحال پر پشاور ہائیکورٹ نے وفاقی اور صوبائی حکومت سمیت دیگر فریقین کو نوٹس جاری کر دیا۔جسٹس سید ارشد علی اور جسٹس ڈاکٹر خورشید اقبال پر مشتمل دو رکنی بنچ نے درخواست پر سماعت کی۔ وکیل درخواست گزار سجاد احمد محسود نے کہا کہ جنوبی اضلاع میں سکیورٹی کی صورتحال انتہائی مخدوش ہے، جس کے باعث لوگوں کی زندگیاں خطرے میں ہیں۔جسٹس سید ارشد علی نے استفسار کیا کہ اس میں جواب کس سے طلب کیا جائے؟ وکیل نے جواب دیا کہ وفاقی حکومت، صوبائی حکومت اور دیگر متعلقہ فریقین سے جواب طلب کیا جائے۔عدالت نے وفاقی و صوبائی حکومت، سیکرٹری داخلہ، آئی جی پولیس اور دیگر فریقین کو نوٹس جاری کرتے ہوئے آئندہ سماعت پر جواب طلب کر لیا۔