مریم نواز کا ایم ایس میؤ اسپتال کو عہدے سے فوری ہٹانے کا حکم

لاہور( اباسین خبر)وزیرِ اعلی پنجاب مریم نواز نے لاہور کے میو اسپتال کا دورہ کیا، جہاں مریضوں نے اسپتال کی انتظامیہ کے حوالے سے شکایات کا انبار لگا دیا۔ اس موقع پر مریم نواز نے اسپتال کی انتظامیہ کی سخت سرزنش کی اور ایم ایس کو فوری طور پر عہدے سے ہٹانے کا حکم دیا۔مریم نواز نے کہا کہ عوام اسپتال میں علاج کی امید اور توقع لے کر آتے ہیں، مگر انتظامیہ کو اس بات کا علم نہیں کہ اسپتال میں کیا ہو رہا ہے۔ انہوں نے مزید کہا کہ جب عوام کے ساتھ ایسا سلوک کیا جاتا ہے، تو اگر یہی صورتحال ذمے دار افراد کے اپنے ساتھ ہو تو انہیں اصل مسئلہ سمجھ آتا ہے۔مریضوں اور ان کے لواحقین نے وزیرِ اعلی کو بتایا کہ انہیں ضروری سامان جیسے سرنجز اور برنولا تک نہیں مل رہے تھے۔ وزیرِ اعلی نے اس پر فوری ایکشن لیتے ہوئے میو اسپتال میں ہنگامی اجلاس کی صدارت کی اور ادویات کے واجبات کی ادائیگی کے لیے فوری اقدامات کا حکم دیا۔ انہوں نے اسپتال میں ادویات کی 100 فیصد فراہمی یقینی بنانے کی ہدایت بھی دی۔