محمدرضوان کپتانی سے فارغ، پاکستانی ٹیم میں بڑے پیمانے پر تبدیلیوں کی تیاریاں

لاہور ( سپورٹس ڈیسک)دورہ نیوزی لینڈ سے قبل پاکستانی کرکٹ ٹیم میں بڑے پیمانے پر تبدیلیوں کی تیاریاں کی جا رہی ہیں، اور رضوان کی جگہ نیا کپتان لانے کے لیے مشاورت شروع ہو گئی ہے۔ پاکستان کرکٹ بورڈ (پی سی بی) نے دورہ نیوزی لینڈ کے لیے پاکستانی اسکواڈ اور منیجمنٹ پر مشاورت مکمل کر لی ہے۔ذرائع کے مطابق عبوری ہیڈ کوچ عاقب جاوید کو دورہ نیوزی لینڈ میں عہدے پر برقرار رکھنے کا امکان ہے۔ تاہم، پی سی بی ہیڈ کوچ کی تعیناتی کے لیے اشتہار دے گا، جس کے بعد نام شارٹ لسٹ ہوں گے اور پھر کوچ کی تقرری کی جائے گی، جو فوری طور پر ممکن نظر نہیں آتی۔ بیٹنگ کوچ کے لیے محمد یوسف کا نام بھی زیر غور ہے۔ذرائع نے بتایا کہ اظہر محمود بولنگ اور محمد مسرور فیلڈنگ کوچ کے طور پر برقرار رہیں گے، جبکہ کوچ شاہد اسلم اور آپریشن منیجر حنا منور دورہ نیوزی لینڈ پر ٹیم کے ہمراہ نہیں جائیں گے۔ذرائع کے مطابق، ون ڈے اسکواڈ میں محمد رضوان کپتان برقرار رہیں گے، اور ٹیم میں چند تبدیلیاں متوقع ہیں۔ تاہم، ٹی ٹوئنٹی اسکواڈ میں کپتان سمیت بڑی تبدیلیاں ہونے جا رہی ہیں۔ شاداب خان ٹی ٹوئنٹی ٹیم کی کپتانی کے مضبوط امیدوار ہیں، اور زمبابوے کے دورے پر بھی محمد رضوان ٹی ٹوئنٹی ٹیم کے کپتان نہیں تھے، بلکہ سلمان آغا نے کپتانی کی تھی۔ٹی ٹوئنٹی اسکواڈ سے محمد رضوان، بابر اعظم، اور نسیم شاہ کو باہر کر دیا گیا ہے، جبکہ محمد حارث، سفیان مقیم، عرفان نیازی اور عباس آفریدی کو اسکواڈ میں شامل کیا گیا ہے۔ شاہین شاہ آفریدی اور حارث روف بھی ٹی ٹوئنٹی اسکواڈ کا حصہ ہوں گے۔دورہ نیوزی لینڈ کے لیے ممکنہ ٹی ٹوئنٹی اسکواڈ میں شاداب خان (کپتان)، محمد حارث، سفیان مقیم، عرفان نیازی، شاہین آفریدی، عباس آفریدی، جہانداد خان، ابرار احمد، عمیر یوسف بن یوسف، خوشدل شاہ، حسن نواز، عبدالصمد، حارث روف، عثمان خان، حسین طلعت اور محمد علی شامل ہیں۔