ہزار سالہ تاریخ میں پہلی باربرطانوی شاہی محل میں افطار کا انعقاد

لندن ( مانیٹرنگ ڈیسک)ونڈسر کیسل کے اسٹیٹ اپارٹمنٹس میں ہزار سالہ تاریخ میں پہلی بار افطار کا انعقاد کیا گیا۔بی بی سی کی رپورٹ کے مطابق، اتوار کو سینٹ جارج ہال میں 350 سے زیادہ لوگ رمضان کا روزہ افطار کرنے کے لیے جمع ہوئے۔شاہی محل میں منعقد کی گئی اس افطار کی تقریب میں شریک ایک شخص نے بی بی سی سے گفتگو کرتے ہوئے کہا کہ یہ ایک حیرت انگیز ماحول ہے، ایسا لگ ہی نہیں رہا کہ یہ حقیقت ہے۔رپورٹ کے مطابق، اس تقریب کا اہتمام لندن میں قائم خیراتی ادارے رمضان ٹینٹ پروجیکٹ نے کیا تھا۔ونڈسر کیسل کے وزیٹر آپریشنز ڈائریکٹر سائمن میپلز نے بی بی سی سے بات کرتے ہوئے بتایا کہ شاہ چارلس کئی سال سے بین المذاہب ہم آہنگی کی حوصلہ افزائی کر رہے ہیں۔واضح رہے کہ سینٹ جارج ہال عام طور پر سربراہانِ مملکت کی تفریح اور خصوصی ضیافتوں کے لیے استعمال ہوتا ہے، لیکن اتوار کے روز یہاں افطار کا اہتمام کیا گیا تھا۔مغرب کے وقت اذان کی آواز سے پوری عمارت گونج اٹھی، جس کے بعد سنتِ نبوی ۖ پر عمل کرتے ہوئے کھجور سے روزہ کھولا گیا اور روزہ کھولنے سے پہلے دعائیں بھی کی گئیں۔