امریکا کا روس کیخلاف جارحانہ سائبر آپریشن معطل

وا شنگٹن ( مانیٹرنگ ڈیسک)امریکی وزیر دفاع پیٹ ہیگستھ نے روس کے خلاف تمام سائبر آپریشنز، بشمول جارحانہ کارروائیوں کو روکنے کا حکم دے دیا ہے۔ امریکی میڈیا کے مطابق یہ فیصلہ روس کے خلاف امریکا کی سائبر حکمت عملی کے جائزے کا حصہ ہے، لیکن پینٹاگون نے اس فیصلے کی مدت اور دائرہ کار کے حوالے سے تفصیلات فراہم نہیں کیں۔حکام نے اس فیصلے پر تشویش ظاہر کرتے ہوئے کہا کہ اس سے امریکا روسی سائبر حملوں کے لیے زیادہ کمزور ہو سکتا ہے۔ ایک سینئر دفاعی اہلکار نے بتایا کہ سیکریٹری دفاع پیٹ ہیگستھ نے آپریشنل سیکیورٹی کے خدشات کی وجہ سے سائبر انٹیلی جنس منصوبوں یا آپریشنز پر کوئی تبصرہ کرنے سے انکار کیا ہے، تاہم انہوں نے یہ بھی کہا کہ سائبر ڈومین سمیت تمام آپریشنز میں جنگجوں کی حفاظت ان کی اولین ترجیح ہے۔یہ فیصلہ اس وقت سامنے آیا ہے جب ٹرمپ انتظامیہ روس کے ساتھ تعلقات بہتر بنانے اور یوکرین جنگ کے خاتمے کے لیے پالیسی پر عمل پیرا ہے۔