ناقص کارکردگی پر بورڈ ناراض، سینئر کھلاڑیوں کا بریک لینے پر غور

لاہور( سپورٹس ڈیسک)چیمپئنز ٹرافی میں پاکستان کرکٹ ٹیم کی ناقص کارکردگی کی وجہ سے سینئر کھلاڑیوں نے اگلی سیریز میں بریک لینے کی مشاورت شروع کر دی ہے۔ذرائع کے مطابق پاکستان کرکٹ بورڈ کے اعلی عہدیدار قومی کھلاڑیوں کی کارکردگی سے ناخوش ہیں اور اس وقت ٹیم میں کئی کھلاڑیوں کی کارکردگی پر سوالات اٹھ رہے ہیں۔ اس صورتحال میں پاکستان کرکٹ ٹیم کے سینئر کھلاڑیوں نے نیوزی لینڈ کے خلاف سیریز میں “بریک” لینے پر مشاورت شروع کر دی ہے، اور بعض کھلاڑیوں کا امکان ہے کہ وہ دورہ نیوزی لینڈ سے دستبردار ہو جائیں۔پاکستان کرکٹ ٹیم کی اگلی اسائنمنٹ نیوزی لینڈ میں وائٹ بال سیریز ہے جس میں 5 ٹی 20 اور 3 ون ڈے میچز شامل ہیں، اور یہ سیریز 16 مارچ سے 5 اپریل تک کھیلی جائے گی۔ ذرائع کے مطابق چیمپئنز ٹرافی میں ناقص کارکردگی کی بنیاد پر بعض کھلاڑیوں کو سیریز سے ڈراپ ہونے کا خدشہ ہے، جس کی وجہ سے کھلاڑی خود سے بریک لینے پر غور کر رہے ہیں۔سیریز کے لیے شاہین شاہ آفریدی، حارث رف، نسیم شاہ اور بابر اعظم کو ڈراپ کرنے کی خبریں گردش کر رہی ہیں۔ اس سے قبل پاکستان کو چیمپئنز ٹرافی کے پہلے میچ میں نیوزی لینڈ کے ہاتھوں 60 رنز سے شکست کا سامنا کرنا پڑا تھا، جبکہ دوسرے میچ میں بھارت نے پاکستان کو 6 وکٹوں سے ہرا دیا تھا اور تیسرا میچ بارش کی وجہ سے منسوخ ہو گیا تھا۔