سعودی عرب: زائرین کیلئے خصوصی ’رمضان قرآن کورس‘ کا آغاز

ر یا ض ( مانیٹرنگ ڈیسک)سعودی عرب میں رمضان المبارک کے دوران خصوصی “رمضان قرآن کورس” کا آغاز کرنے کا اعلان کیا گیا ہے۔ یہ اعلان مسجد الحرام اور مسجد نبوی ۖ کے مذہبی امور کے ادارے کے صدر کی جانب سے کیا گیا۔ ان کا کہنا ہے کہ رمضان کے دوران زائرین کو بہتر سہولتوں کی فراہمی کے لیے تمام تیاریاں مکمل کر لی گئی ہیں۔اس کورس کے دوران تحفیظِ قرآن کریم کے 220 حلقوں کا انتظام کیا گیا ہے۔ اس کے علاوہ 10 سے زائد زبانوں میں دروس کا خصوصی بندوبست کیا جائے گا تاکہ مختلف زبان بولنے والے زائرین کو سہولت مل سکے۔ تلاوت قرآن کی درستگی کے لیے خصوصی کلاسوں کا بھی اہتمام کیا گیا ہے، جو 20 ہزار گھنٹوں پر محیط ہوں گی۔زائرین کو مسائل کے شرعی حل سے آگاہ کرنے کے لیے 30 مفتیان اور علمائے کرام کو مسجدِ نبوی ۖ کے اندر اور بیرونی صحنوں میں متعین کیا جائے گا۔حرمین شریفین میں مذہبی امور کے صدر شیخ ڈاکٹر عبدالرحمن السدیس کے مطابق یہ اقدام امتِ مسلمہ کے باہمی اتحاد و اتفاق کو فروغ دے گا اور رمضان کے مبارک مہینے میں علم و ہدایت کے حصول کے لیے ایک بہتر موقع فراہم کرے گا۔