افریقہ-1 سب میرین انٹرنیٹ کیبل پی ٹی سی ایل سے منسلک کردی گئی

اسلام آباد( مانیٹرنگ ڈیسک)پاکستان ٹیلی کمیونیکیشن کمپنی لمیٹڈ (پی ٹی سی ایل) نے اپنے ڈیجیٹل اور ٹیلی کمیونیکیشن نظام کی بہتری کے لیے پاکستان کو افریقہ-1 سب میرین کیبل سے منسلک کر دیا ہے۔ یہ اقدام پاکستان کے عالمی ڈیجیٹل روابط کو مستحکم کرنے اور ملکی ٹیلی کمیونیکیشن ڈھانچے کو جدید بنانے کی سمت میں ایک اہم قدم ہے۔افریقہ-1 سب میرین کیبل، جو کہ 10,000 کلومیٹر طویل ہے، کراچی میں پی ٹی سی ایل ایکسچینج سے منسلک کر دی گئی ہے۔ اس کیبل سسٹم میں جدید ترین ٹیکنالوجیز شامل ہیں، اور یہ پاکستان کو سعودی عرب، متحدہ عرب امارات، مصر، سوڈان، الجیریا، فرانس، کینیا، اور جبوتی جیسے اسٹریٹجک اہمیت کے حامل مقامات سے جوڑتا ہے۔پی ٹی سی ایل نے اس کیبل سسٹم کنسورشیم میں باضابطہ معاہدہ کیا ہے تاکہ عالمی ڈیجیٹل مراکز کے ساتھ پاکستان کے روابط کو مزید مستحکم کیا جا سکے۔پی ٹی سی ایل کے گروپ نائب صدر برائے انٹرنیشنل بزنس، سید محمد شعیب نے اس موقع پر کہا کہ افریقہ-1 کیبل سسٹم میں پی ٹی سی ایل کی شرکت پاکستان کے “ڈیجیٹل وژن 2030” کے مطابق ہے۔ انہوں نے مزید کہا کہ کمپنی کا مقصد ڈیجیٹل تقسیم کا خاتمہ کرنا اور لوگوں کو بااختیار بنانا ہے تاکہ مختلف شعبوں میں جدت کو فروغ ملے اور ملکی معیشت مستحکم ہو سکے۔افریقہ-1 کی سب میرین کیبل سسٹم 2026 کے اوائل میں فعال ہو جائے گی، جس کے بعد صارفین کو عالمی معیار کی انٹرنیٹ سہولتیں فراہم کی جائیں گی۔