پاکستان میں ویرات کوہلی کی پذیرائی پر نفرت کا زہر اُگلتا بھارتی میڈیا بھی حیران 

ممبئی ( سپورٹس ڈیسک)چیمپئنز ٹرافی 2025 کے پاکستان اور بھارت کے میچ میں پاکستانی شائقین کی جانب سے ویرات کوہلی کو ملنے والی بے پناہ پذیرائی نے بھارتی میڈیا کو حیرت میں ڈال دیا ہے۔دبئی میں ہونے والے اس میچ میں ویرات کوہلی نے بھارتی ٹیم کو شاندار سنچری کے ذریعے فتح دلائی، لیکن سب سے دلچسپ بات یہ تھی کہ پاکستانی شائقین نے بھی ان کی کارکردگی کو بھرپور سراہا۔ یہ منظر بھارتی میڈیا کے لئے غیر متوقع تھا، کیونکہ وہ عموما پاکستان اور بھارت کے میچز کو ایک جنگ کی شکل میں پیش کرتا ہے۔ تاہم، پاکستانیوں نے ایک بار پھر ثابت کیا کہ وہ کھیل کو محض ایک کھیل کی نگاہ سے دیکھتے ہیں، اور کھلاڑیوں کی صلاحیتوں کو قدر کی نگاہ سے سراہتے ہیں، چاہے وہ کسی بھی ملک سے تعلق رکھتے ہوں۔ویرات کوہلی کی سنچری نہ صرف بھارتی شائقین کو خوشی سے سرشار کر گئی، بلکہ پاکستانی شائقین نے بھی اس کی بے حد تعریف کی۔ یہ دیکھ کر بھارتی میڈیا کو اپنی روایتی رپورٹنگ پر نظر ثانی کرنا پڑی، جو اکثر دونوں ممالک کے درمیان نفرت کی فضا پیدا کرنے کی کوشش کرتا ہے۔ہندوستان ٹائمز نے اپنی رپورٹ میں پاکستانی میڈیا کے حوالے سے لکھا کہ پاکستانی اخبارات نے کوہلی کی کارکردگی کی دل کھول کر تعریف کی۔ ایک اخبار نے اپنی سرخی میں لکھا کہ کوہلی نے جس شاندار کھیل کا مظاہرہ کیا، اس کی بدولت بھارت کو پاکستان پر فتح حاصل ہوئی۔اسی طرح، ایک اور مضمون میں کوہلی کو خراج تحسین پیش کرتے ہوئے کہا گیا کہ پاک بھارت کرکٹ کی تاریخ میں کسی بھی کھلاڑی نے اتنا اثر نہیں ڈالا جتنا ویرات کوہلی نے۔ یہاں تک کہ پاکستان کے لیجنڈری کھلاڑیوں جیسے وسیم اکرم اور عمران خان نے بھی پاک بھارت میچ میں اتنا اثر نہیں ڈالا۔اس میچ کے دوران پاکستانی شائقین اور میڈیا کی سوچ بھارتی میڈیا سے مختلف تھی، جو کھیل کو محض ایک جنگ کے طور پر پیش کرتا ہے۔ پاکستانی عوام نے کھیل کو ایک سپورٹس کی حیثیت سے قدر کی نگاہ سے دیکھا، اور کوہلی کی شاندار کارکردگی کو دل کھول کر سراہا۔ یہ واقعہ اس بات کا غماز ہے کہ کھیلوں میں شائقین کی جانب سے حقیقی فنی مہارت کی قدر کی جاتی ہے، اور یہ ہمیں کھیلوں کے میدان میں دوستی اور احترام کے اہم پہلوں کو سمجھنے میں مدد دیتا ہے۔