پاکستان سٹاک مارکیٹ میں تیزی کے بعد مندی کا رجحان

کراچی( کامرس ڈیسک)پاکستان سٹاک مارکیٹ میں تیزی کے بعد مندی کا رجحان دیکھنے میں آ رہا ہے۔کاروباری ہفتے کے آخری روز کاروبار کا آغاز مثبت زون میں ہوا، تاہم مالی لین دین کے دوران 100 انڈیکس میں 150 سے زائد پوائنٹس کی کمی دیکھنے کو ملی۔پاکستان مارکیٹ میں کاروبار کے دوران 100 انڈیکس میں 154 پوائنٹس کی کمی آئی، جس کے بعد مارکیٹ میں 100 انڈیکس ایک لاکھ 13 ہزار 585 پوائنٹس کی سطح پر ٹریڈ کر رہا ہے۔ کاروبار کے دوران ہنڈرڈ انڈیکس ایک بار ایک لاکھ 14 ہزار 444 پوائنٹس کی سطح پر بھی گیا۔یاد رہے کہ گزشتہ روز کاروبار کا اختتام مثبت زون میں ہوا تھا، جہاں سٹاک مارکیٹ میں ہنڈرڈ انڈیکس 396 پوائنٹس اضافے کے ساتھ ایک لاکھ 13 ہزار 739 پوائنٹس پر بند ہوا تھا۔دوسری جانب پاکستانی روپے کی قدر میں معمولی استحکام آیا ہے، انٹر بینک میں امریکی ڈالر 6 پیسے سستا ہو گیا، جس کے بعد انٹر بینک میں ڈالر 279 روپے 46 پیسے سے کم ہو کر 279 روپے 40 پیسے پر فروخت ہو رہا ہے۔