لندن میں شریف فیملی کے ارکان پر حملے کا خطرہ، میٹ پولیس نے خبردار کردیا

لندن( مانیٹرنگ ڈیسک)برطانیہ کے شہر لندن میں شریف فیملی کے ارکان کو نامعلوم افراد کی جانب سے پرتشدد حملے کا خطرہ ظاہر کیا گیا ہے۔قابل اعتماد ذرائع کے مطابق، میٹ پولیس نے شریف فیملی کے ارکان کو اس خطرے کے حوالے سے آگاہ کیا ہے۔ ویسٹ مڈلینڈز پولیس نے لندن کی میٹروپولیٹن پولیس کو ممکنہ حملے کے بارے میں اطلاع دی، جو انٹیلی جنس مانیٹرنگ سسٹم سے حاصل ہوئی تھی۔باوثوق ذرائع نے بتایا کہ سکاٹ لینڈ یارڈ کے افسران نے ایون فیلڈ فلیٹس میں جا کر شریف فیملی کے ارکان کو خطرے سے آگاہ کیا اور انہیں چوکنا رہنے کی ہدایت کی، ساتھ ہی ان سے کہا گیا کہ وہ اپنے آنے جانے میں احتیاط برتیں۔یاد رہے کہ دو ہفتے قبل گلفام حسین کو پولیس نے ایون فیلڈ فلیٹس کے باہر سے گرفتار کیا تھا اور اسے فلیٹس کے قریب آنے سے منع کر دیا تھا۔ ذرائع کے مطابق گلفام حسین کی گرفتاری کا ویسٹ مڈلینڈز پولیس کے انتباہ سے کوئی تعلق نہیں ہے۔