اسلام آباد( کامرس ڈیسک) وفاقی وزیرداخلہ محسن نقوی نے واشنگٹن میں یو ایس چیمبر آف کامرس میں امریکا پاکستان بزنس کونسل کے اعلی سطح کے وفد سے ملاقات کی۔ملاقات میں مائنگ اور انفارمیشن ٹیکنالوجی کے شعبوں میں سرمایہ کاری اور تعاون بڑھانے پر تفصیلی گفتگو کی گئی۔ وزیر داخلہ نے امریکی سرمایہ کاروں کو کان کنی اور آئی ٹی سیکٹر میں سرمایہ کاری کی دعوت دی۔محسن نقوی نے پاکستان میں کام کرنے والی امریکی کمپنیوں کے مسائل سنے اور یقین دہانی کرائی کہ ان مسائل کو ترجیحی بنیادوں پر حل کیا جائے گا۔انہوں نے کہا کہ یو ایس پاکستان بزنس کونسل پاکستان میں موجود سرمایہ کاری کے بے پناہ مواقع سے فائدہ اٹھا سکتی ہے۔ وزیر داخلہ نے مزید کہا کہ پاکستان معاشی استحکام کی جانب گامزن ہے اور معیشت ٹیک آف کر رہی ہے، تمام معاشی اشاریے بہتر ہوئے ہیں۔پاکستان میں سرمایہ کاری کے پر کشش مواقع موجود ہیں اور این او سیز کے اجرا میں بہتری لائی گئی ہے۔ وفاقی وزیر نے امریکی کمپنیوں کو خصوصی سہولتیں فراہم کرنے کی یقین دہانی کرائی۔وفد میں امریکن چیمبر آف کامرس کے سینئر نائب صدر چارلس فریمین، ایگزیکٹو ڈائریکٹر ایسپیرنزا جیلالین، ایگزیکٹو ڈائریکٹر ایبل ٹواریس، اور دیگر اہم شخصیات شامل تھیں، جبکہ پاکستان کے سفیر رضوان سعید شیخ اور دیگر حکام بھی موجود تھے۔
وزیر داخلہ کی امریکی سرمایہ کاروں سے ملاقات، مسائل ترجیحی بنیادوں پرحل کرنے کی یقین دہانی
14