ڈونلڈ ٹرمپ آج دوسری بار امریکا کی کمان سنبھالیں گے

واشنگٹن( مانیٹرنگ ڈیسک)ڈونلڈ ٹرمپ آج دوسری بار امریکا کی کمان سنبھالیں گے، اور نومنتخب امریکی صدر کی حلف برداری کی تقریب آج ہوگی۔نومنتخب امریکی صدر کی تقریب حلف برداری کی تمام تیاریاں مکمل کر لی گئی ہیں، اور سکیورٹی کے بھی سخت انتظامات کیے گئے ہیں۔ وائٹ ہائوس سے 3 کلو میٹر تک کا علاقہ گاڑیوں کی آمدورفت کے لیے بند کر دیا جائے گا۔امریکی دارالحکومت واشنگٹن میں آج درجہ حرارت منفی 11 ڈگری تک گرنے کا امکان ہے، جس کے پیش نظر ٹرمپ اوپن ایئر کے بجائے عمارت کے اندر روٹنڈا ہال میں منصب کا حلف اٹھائیں گے۔ کیپٹل ہل کی عمارت میں صرف 600 افراد کو تقریب میں شرکت کی اجازت دینے پر غور کیا جا رہا ہے۔دوسری جانب عمارت کے اندر حلف برداری کی تقریب کرنے پر ڈیموکریٹس نے نومنتخب صدر ٹرمپ پر تنقید کی ہے۔ نائب صدارتی امیدوار ٹم والز نے ٹرمپ کو تنقید کا نشانہ بناتے ہوئے کہا کہ سرد موسم ایک بہانہ ہے، اصل وجوہات کچھ اور ہیں۔